م. مجدى عزيز يكتب: خلى بالك

خلى بالك من بلدنا
مصر أم الدنيا زادنا
مهما عصيت، ولا قسيت
برضو أغلى من ولادنا

خلى بالك من بلدنا
اللى قايمة فيها مادنة
حاضنه قبة للكنيسة
خليت العالم حسدنا
وخلى بالك من بلدنا

خلى بالك من فلول
دايرة تخرب فى العقول
يا ريت تفارق ويوم تزول
ونشوف عقول أفضل تفيدنا
وخلى بالك من بلدنا

خلى بالك م التعصب
فى النفوس خلاص ترسب
وكله خاسر موش ها يكسب
والقوه دايمًا فى اتحادنا
وخلى بالك من بلدنا

خلى بالك من دقون
مايهمهاش مصرك تهون
وموش مهم مين نكون
المهم يزيد نكدنا
وخلى بالك من بلدنا

خلى بالك م الضمير
عندهم نايم قتيل
جاب لحافه وجاب سرير
وقال خلاص إحنا قعدنا
وخلى بالك من بلدنا

خلى بالك م الحضارة
اللى كانت يوم منارة
منورة الدنيا بجدارة
وموش مهم كام عددنا
وخلى بالك من بلدنا

خلى بالك م المسيرة
مصرك الحرة كسيرة
بإيدين كتير بقت أسيرة
وبتناديك تصون عهودنا
وخلى بالك من بلدنا

خلى بالك م المشير
حمله يا ولداه كبير
وإيد فى إيد تنجز كتير
والإخلاص هو سندنا
وخلى بالك من بلدنا

خلى بالك م التفاؤل
وأبقى جاهز للتساؤل
إزاى ها تعدل كل مائل
والحلول دايمًا فى إيدنا
وخلى بالك من بلدنا