غادة عطا تكتب: فى لحظة صدق

فى لحظة صدق من جواك مع نفسك
حاجات كثير ممكن تشوفها بشكل تانى
وتبدأ تجدد بروح مختلفة فى حياتك
فى لحظة صفاء مع ذاتك تشوف كثير غايب عنك
وتمر حياتك قدام عينيك فتكتشف نفسك
وكأنك أول مرة تشوفها وتعرفها
كفاية تلوم على غيرك وترمى كل أخطاءك على الدنيا
وتلوم الظروف والناس
كفاية تشوف عيوب غيرك
وتشوف نفسك من غير عيوب
كفاية تقول مقدرش وتتحجج قدام نفسك
أنك مظلوم من كل الناس
واجه خوفك واجه ضعفك
بأخطاءك اعترف لأن مفيش حد معصوم
وما يفيدش فى أى شىء الدموع واللوم على غيرك
لما تكابر عمرما شىء غلط فى حياتك هيتصلح
أنت المسئول عن حياتك وأفعالك
أنت المسئول عن مستقبلك وأحلامك
لو حبيت تعيش فاكر إنك مظلوم
وترتاح لأنك وحدك شايل كل الهموم
أكيد هتفضل عايش متألم ومهزوم
وصعب تحافظ على أى شىء جميل فى حياتك
وصعب تشوف أى أمل أو تحس لحظة سعيدة مرت بك
لأن استغراقك وسط الهموم والحزن
يمنع عينك تشوف أى جمال فى حياتك
ويمنع قلبك يحس بمشاعر أى شخص
نقى ومخلص بيحاول يسعدك.
ساعتها فعلا لازم تكون مهموم لأنك ضيعت فرص
أكثر للسعادة والفرح فى حياتك.
بامكانك تعيش سعيد لما ترضى بكل لحظة تمر بك
وتعرف أن الحياة فيها المر وفيها الحلو
ومتقفش كثير قدام الصعب والمر
إلا علشان تستوعب خبرات الحياة
ومن المواقف تفهم وتتعلم ومن ألمك تكون أقوى
وتدور على أى لحظة تفرح بها وتشد نفسك من الهم
مش عيب أبدا أنك تغلط وتتعلم وكل مرة هتكون أنضج وتتعامل أكيد أفضل مع حياتك
بإمكانك تعيش الواقع بكل ما فيه
وتتغلب على صعابه بإرادتك وعزيمتك
وفى كل يوم تسعى بنفس راضية وقلب طيب
بدون غل وطمع وظنون
أو تستسلم لضعفك وآلامك وتعيش مهزوم .
بإمكانك تعيش راضى وقادر تكمل بأمل جديد فى كل يوم
أو تعيش مهموم مأزوم وكل لحظة مرة تمر عليك كأنها عمر
فتش فى حياتك هتلاقى حاجات كثير حلوة ممكن تسعدك
وناس طيبة وجودها فى حياتك يطمنك
ولما تبص على حياتك بتفاؤل وحب
وتحمد ربنا فى كل صبح مع كل طلعة شمس
هتتفاجئ إن حياتك بطعم الأمل أصبحت أحلى.