فيسبوك
واتساب
شىء مثير للسخرية والاشمئزاز لما نتحول من ناس بتحاول تبنى نفسها وتحقق ذاتها لناس كل أملها تلاقى مبررات لفشلها.
فى فرق بين إنك بتحاول تنجح بجد وبين إنك بتحاول تلاقى مبرر لفشلك فى أمر معين.
يعنى مثلاً لما تبقى المفروض إنك تعمل حاجة وأثناء ما أنت بتعملها تتمنى أن حاجة تعطلها ومتكملش تبقى بتدور على مبررات فشل.
لما ما تعملش اللى عليك مظبوط تبقى مش بتحاول تعمله أنت بتدور على مبرر إنك متعملوش.
لما تسمع بس لقصص فشل وحكايات ناس فاشلة تبقى مش بتحاول تأخد عبرة أو تتعلم لا أنت بتدور على مبرر لفشلك.
لما تعمل الخطوة مش بقلب وضمير تبقى مش ناوى تعملها أنت بس بتدور على مبررات فشل.
لما تطلع لكل حاجة سبب من خيالك عشان متعملهاش تبقى مش بتدور على المنطق أو بتحسبها لا أنت بس بتحاول تقول ليه مش هتعملها.
لما تكبر كل حاجة وتعمل مشكلة من مفيش تبقى بتدور على مبرر تقوله ليه مش هتعمل.
وكتير وكتير من مبررات الفشل اللى مبتخلصش
والسؤال إيه أخرة مبررات الفشل؟
بالتأكيد فشل لأن بالظبط عامل زى اللى ناوى يفشل وعايز يفشل بس عايز يريح نفسه ويقنع الناس بسبب وخلاص
سؤال تانى برده وإيه أخرة الفشل؟
ضياع الحياة وضياع عمرك وضياعك أنت بالكامل لأن فى فرق بين الفشل فى حاجة معينة ونتعلم منه ونحاول نقوم تانى وبين أننا نختار الفشل طريق
طيب والحل
الحل إننا بدل ما ندور على مبررات فشل نتعامل بمبادئ وضمير وبصدق مع نفسنا ونحاول نوجد طرق نجاح ونوفر طاقتنا وتفكيرنا فى تحضير فكرة نجاح بدلاً من تحضير
مبررات فشل
صورة أرشيفية
