مينا أمين يكتب: كلام فارغ

لما تنادى بالحرية وأنت أول الكافرين بيها يبقى كلام فارغ.

لما تهتف بالعدالة وأنت شغال بالواسطة والكوسة!! يبقى كلام فارغ
لما تقول الثورة فين وأنت أول من تاجروا بيها يبقى كلام فارغ،
لما تقولى هعمل وهعمل وفى الآخر متعملش لو صدقناك تانى يبقى كلام فارغ.

لما تكتب كلمتين بدون معنى وييجى كام واحد من أصحابك اللى ملهمش معنى يعمل لايك وشير وتقولى ناشط سياسى يبقى كلام فارغ.

لما تقول الدولة ظالمة ومفترية عشان بتواجه البلطجية يبقى كلام فارغ.

لما تتكلم ضد الدولة البوليسية وأنت فى يوم تحالفت معاها يبقى كلام فارغ.

لما تهاجم كل واحد خالف رأيك يبقى كلام فارغ.
لما متعرفش تفرق بين حالة ثورية وبين ثوارات كل شويه يبقى كلام فارغ.

لما تقعد تتفرج وتتابع من بعيد، وتنادى بالعمل والتقدم يبقى كلام فارغ.

لما تفرق بين البنت والولد لمجرد أنها اتخلقت بنت ونصيبها كدة يبقى كلام فارغ.

لما الناس تحب حد لكن ترفض أى حد ميحبوش وتهاجمه يبقى كلام فارغ.

لما تقولى الحرية يعنى تشتم بس وتهاجم وتلعن يبقى كلام فارغ
لما خلاف سياسى يتحول لموت ودم يبقى كلام فارغ.

لما عشان أحقق الاستقرار أظلم ناس فى السكة يبقى كلام فارغ
لما تنادى بالثورة وانت امبارح اتبرأت منها يبقى كلام فارغ.

لما تنكر حقيقة واقعة وتكلمنى عن أفلام من خيالك المريض يبقى كلام فارغ.

لما تخاف من بكرة لمجرد انك متعرفش مخبى إيه يبقى كلام فارغ
لما نسيب وطن مجروح ينهار ونقطع فى بعض يبقى كلام فارغ.

وألف لما ولما وألف جملة وجملة وللأسف مازال هناك من يصدقون ويعشقون الكلام الفارغ.