نانى تركى تكتب: عيد الحب.. بجد!!

عيد الحب؟!! يا عزيزى فى بلادى يتعاطون الحب سراً والكره علانيةً.

نعم يحبون سراً وكأنه وصمة عار ولو كان عندهم ثقة به لافشوا سرهم وأحبوا على الملأ بل وتفاخروا بيه.. جعلته سراً أكيد لعلة، والأكيد أن العلة منك، لأن الحب مشاعر جميلة دينى لم يحث إلا عليها.. ولكن العلة أتت منك ومن نواياك!! فيه حاجة غلط متنكرش الغلط وتقول حبيت وأنا فى مجتمع لا يفهم تلك المشاعر النبيلة.. هى فين نبيلة يا حبيبى.. نبيلة انتحرت ربنا يعفو عنها ويغفر لها.

أما الكره يا روحى عليه.. يا سيدى عليه.. مدعاة للتفاخر حاجة كده تشرح القلب الحزين خسارة مغنتلوش الست.. أنت عارف قبله معنى الكره إيه قبل ما تتكلم عليه.. قصدى قبل ما تتفشخر بيه!! مشاعر مقيتة تدين صاحبها ولو كان مظلوماً!!.. أيوه ولو كان مظلوماً.. مش أى حد يعرف يكره واللى يعرف يكره عمره ما يعرف يحب ولا عمره حب ولو حلفتلى من هنا للسنة الجاية.

كره بعضنا البعض متفاخرين باننا مختلفين سياسياً وكان معظمنا من ثلاث سنين فقط لا ليه فى السياسة ولا تعنيه أصلاً.. نعم اختلفنا فى الآراء سياسياً واجتماعياً ودينياً بس نكره بعض ليه!! لا بجد ليه؟!! إيه العلاقة.. ثقافة الرأى والرأى الآخر فى الحضيض يافندم.

أرجوك لا تحدثنى عن عيد الحب فى بلاد أصبح فيها الحب تمثيلا لا إخلاص نية فيه ولا ضمير.. ومارسوا بدلاً منه الكره بضمير.. يا واد أنت يا ضمير!!!