محمد نبيل منيب يكتب: مفيش فايدة

لو دققت شوية فى مصر- أو حتى من غير ما تدقق- هتلاحظ إن مصر من البلاد النادرة اللى بتتأخر من قديم الأزل مش بتتقدم!، اتفرج على تقدم الفراعنة من 7000 سنة فى شتى المجالات كنا المفروض بقينا حاجة خيالية دلوقتى- أو احنا فعلا بقينا حاجة خيالية بس بشكل تانى!.

وابتدى مستوانا ينزل تدريجياً مرورا بمراحل التاريخ فى السكة عدينا على عصور إسلامية مهمة- وعصور الأتراك والتقدم فى عصر محمد على- تخيلوا عصر محمد على المتقدم ده كنا انحدرنا أد إيه عن وقت الفراعنة!.

ويستمر هبوط أسهم "التقدم" ونتأخر أكثر وأكثر وصولاً لأبناء وأحفاد محمد على والشكل المعمارى "الباقى حتى الآن" فى منازل وسط البلد والشوارع النظيفة "ساعتها" اللى بنشوفها فى الصور..

فى مصر عام 1896 كان تانى عرض سينمائى فى العالم! وعرض فى الإسكندرية بعد أيام قليلة من أول عرض سينمائى فى التاريخ بباريس.. يعنى السينما دخلت مصر تانى بلد بعد فرنسا! مش لازم أقولكم وصلنا لإيه فى النقطة دى بالذات أكيد أنتوا عارفين!

طبعا المصريين حسوا إن الدولة مستواها بيتدنى وطلع منهم واحد زيى كدة حسبها، وقال إن مستوانا بينزل يوم عن التانى من 7000 سنة فقرروا يأيدوا ثورة 52 طبعا عشان نرجع نعلى تانى.. والحمد لله.. الحمد لله كملنا بنفس مستوى الهبوط وابتدينا نزيد وابتدت الزحمة تزيد والشكل الجمالى اللى كنت تشوفه فى وسط البلد زمان بقى سوق وبعد ما كانت أى عمارة بتتبنى بشكل جمالى بقت تتصب على شكل مستطيل!

والشوارع اتوسخت بحمد الله وبحسن تعاونكم وتعاونى أنا كمان معاكم، فقولنا لأ.. مش هنسكت.. وشيلنا "مبارك" اللى شهد عصره 30 سنة هبوط كمان... جه مرسى وكملنا فى سكتنا وفضلنا نهبط بنفس سرعتنا! و مكملين.. اختصار كلامى.. قارن بين الهرم اللى اتبنى من سبع آلاف سنة وبين بيتك اللى أنت ساكن فيه!

قارن بين وسط البلد من 60 سنة ووسط البلد دلوقتى "ده لو عرفت توصلها"، خد بالك إن مصر تانى بلد اتعرض فيها سينما فى العالم، وشوف بقينا فين وكل البلاد سبقتنا فى المجال ده وبقت فين!

طب فاكر أما كنا بنتريق على الأفلام الهندى من 10 سنين بس.. شوف هما بقوا فين وإحنا بقينا فين! طب فاكر من 30 سنة لما كانت البنت بتمشى فى الشارع حاسة بالأمان!.. مقارنات كتير لو عملتها هيجيلك اكتئاب.. وما زلنا مكملين.. احنا محتاجين ثورة تصحيح فى كل المجالات وعلى نفسنا أولاً.. ثورة تصلح غلطة هبوط مستمرة من آلاف السنين.