بالفيديو.. مأساة طفلة داخل محكمة الأسرة.. "ندى": بابا مات وسابنى وعيلته عايزين ياخدونى.. بيضربوا ماما وطردونا من البيت.. وأنا زعلانة من بابا علشان سابنا للبهدلة دى وأنا صغيرة وخايفة منهم

"بابا مات وإحنا كل يوم بقالنا سنة فى المحكمة.. علشان ناخد حقنا من أهله هما وحشين مش بيحبوا ماما وبيخلوها تبكى وبيضربوها وطردونا من بيتنا".. هذه الكلمات قالتها الطفلة "ندى" التى تبلغ من العمر 6 سنوات أثناء تواجدها مع والدتها بمحكمة أسرة زنانيرى بسبب النزاع القائم بينها وبين أهل الزوج المتوفى وإتمام إجراءات الوصاية.

وتابعت "ندى" لـ"اليوم السابع": "بعد موت بابا كل يوم عماتى يخلوا ماما تزعل علشان عايزنّا نطلع من البيت هما أصلا مش بيحبوا ماما وعايزين ياخدونى منها ويخلوها لوحدها, عمتى فى مرة دخلت البيت وضربت ماما وشدتها من شعرها وقعدت تشتمها وتقولها: يا انتصار إنتى السبب إن أخونا مات وهو متهناش فى البيت ده علشان كده مينفعش أنت تتهنى وتعيشى فيه.. بعد ما طردونا رفضوا حتى نجيب هدومنا من البيت ولما أختى إترجت عمتى خلتنا نروح, بس لقينا البيت كل حاجة فيه متكسرة والبيت كله تراب وفئران وملقناش أى حاجة ناخدها".

وقالت "ندى": "أنا بكرة آجى المحكمة دى لأن كل مرة بيخلوا ماما تعيط علشان بيقعدوا يطلعوا فيها كل شوية فى المكاتب وفى الآخر مش بيساعدوها أنا نفسى أعيش أنا وأخواتى من غير خوف من أهلنا".

واستطردت الطفلة: "ماما مش السبب فى موت بابا زى ما بيقولوا دى كانت بتقعد تحت رجليه وهو تعبان وتروح معاه كل يوم المستشفى دى والله العظيم كانت بتبكى عليه لما يقعد يتوجع.. أنا زعلانة من بابا علشان سابنا للبهدلة دى ونفسى يجى ويساعد ماما لأنها تعبت وأنا مش عارفة أساعدها علشان أنا صغيرة وبخاف منهم قوى".