محمد مرحلى عبد الرحمن يكتب: المهم التركيز على المستقبل يا ناس

مبارك براءة؟ حقًا براءة لأنكم حاكمتوه جنائيًا لأنكم ارتضيتم أن يحاكم جنائيًا، وما ارتكب شيئًا ولا حاد القاضى عن القانون.

لماذا لم تقفوا وتثوروا لمحاكمته سياسيًا بعد 25 يناير، لماذا لم تثوروا لمحاكمته وتتجمهروا لمحاكمته على أوضاع خلفتها فترة حكمه من ظلم شرطة وفساد أجهزة دولة وزيادة بطالة وإهانة كرامة الشعب تحت التراب، لماذا لم تثوروا لمحاكمته سياسيًا هو ومن كان يساعده وقتها لو حوكم سياسيًا عن أوضاع مخلفات 30 سنة من حكمه كنتوا عرفتوا أقل حاجة إيه اللى كان بيحصل فى مصر ووصلها لكدة عشان نتفادى مع غيره.. كنا خدنا حقنا منه وجعلناه عبرة لغيره من الرؤساء عبرة للى يتاجر بأحلام الناس وكرامة الناس.

بس للأسف أنتوا اتبسطوا وفرحتوا لكون حسنى مبارك بيتحاكم وبيتسجن مانتوا مش مصدقين نفسكوا عشان كدة مفكرتوش هو بيتحاكم ليه وهل هو ارتكب الجرائم دى فعلاً ولا لا.

ليه بتبصوا للخلف اتركوا مبارك يحكم عليه الله والتاريخ بما فعله فى حق الناس.
وغلطتكوا وخلصت خلاص والقاضى راجل محترم وقضى بما أمامه من شهادات وأوراق وادلة والله مطلع على كل شيء.

أنسوا وخليكوا فى دلوقتى استيقظوا للانتخابات البرلمانية لأنكم ستحاسبون الحكام من خلالها وعشان تعرفوا بعد البرلمان مش من حقكوا تعملوا حاجة ولا تثوروا على حاجة ولا تقولوا رأيكم فى حاجة عشان وقتها الرئاسة والحكومة هايبقى عندها حق عشان انتوا انتخبتوا الناس اللى بتمثلكوا واللى ببتكلموا باسمكم.

اصحوا وانتخبوا اللى يمثل أفكاركم وآرائكم مش اللى يقدم خدمة هنا ولا هنا واعرفوا إن الخدمة واجبة على الدولة لكل الناس المهم اللى يحاسب الدولة على تقديمها سبل راحة الشعب.

انظروا للمستقبل ولا تلتفتوا خلفكم فكثيرًا يريدونكم دائمًا فى غيابات الماضى، فالماضى للتاريخ والمستقبل لنا وبأيدينا.. تحيا مصر.