سامح لطف الله يكتب: مش هدفع أكتر

إيّاك ترفع يوم تذكرته
الملايين معتمدة عليه
ساعة الصبح اتفرج شوف
تلقى ألوف تترص يا بيه
كله بيحسب بالسحتوت
دخل مفيش ف هترفع ليه؟
عايز ترفع زود راتبى
علِّى مراتبى
واحنا ساعتها نقولك هيه
مش طايلين الحد الأدنى
وحدك أقصى يا عينى عليه
شغل مخك أيوه وفكّر
قبل ما دمى يا باشا تعكر
قبل الإيد ما تشحور جيبى
والجنيهات جوّاه تتكدر
قبل ما تمسح جيبى يمينك
إدى المصرى لحقه وقدّر
الفقران فى بلدنا الملطش
كله علينا يا ناس يتشطّر؟
واللى رواتبه فى شهر ألوف
مكسوف منه عشان متيسر
والغلبان خرّمت جيوبه
تحرق قلبه ودمعه اتبعتر
عض القلب هسيبلك عضة
أمّا رغيفى عليه هتحسّر
جوز جنيهات واحسبها معايا
هى الراحة وهى الحاية
همّا يدوب مش هدفع أكتر
لسه التوكتوك وام حمادة
والمصاريف على ودنه بتكتر
يا إما هجيبلك كل عيالى
وخد ملاليمى واصرف بعتر