"مهمة فى تل عبيط" .. اليوم السابع ينشر أول فيلم مصور بطولة نجمة الجواسيس "أبلة فاهيتا".. سيناريو وإخراج "وائل السمرى"

سيناريو وائل السمرى
التتر
معلش يا أبلة فاهيتا
دول مخابيل الماسونية
ومادام الدولة عبيطة
فطبيعى نكون ملوخية
هتفكى الشفرة ورا الشفرة

وميعادنا هيجى أكيد بكرة
ونروح
ع العباسية
يا فهيتا
يا فهيتا




1_أبلة فاهيتا تجلس فى بيتها تستمع لأغنية «يا حبيبتى يا مصر يا مصر» ثم تسمع طرقاً على الباب
صوت الطرق.. طاخ طاخ طاخ
أبلة فاهيتا: يا كركورة.. شوفى مين اللى بيخبط.. إنتى يا بت يا كركورة.. شكلك بتلعبى فى مناخيرك ومش هتسمعينى.. أما أقوم أنا.



2_فاهيتا تفتح الباب وتجد أمامها«بطة» غاية فى الأناقة

البطة: إنها فرصة سعيدة.. أنقل لك تخيات شعب ماسونيا العظمى وأبلغك بأنه تم اختيارك لإلقاء مخاضرة سخنة مشعللة عشان توصفى لنا أكلات مصر وشعب مصر ومصر مصر والسفر بكرة الصبخ.
فاهيتا: من إنيا يا سوسو.. دنا أحسن واحدة تعمل بليلة باللبن وسد الخنك وقلقاس.




3_أبلة فاهيتا تستمع لأغنية «شهداء 25 يناير ماتوا فى أحداث يناير» وتعد حقائب السفر لماسونيا ثم تسمع صوت طرق على الباب

صوت الباب.. طاخ طاخ طاخ، وصوت من وراء الباب:
افتحى يا فاهيتا.. إحنا الشرطة الوطنية لمكافحة الجاسوسية.. المكان كله محاصر.




4_فاهيتا تفتح الباب وتجد أمامها رجلاً تظهر عليه سمات الجدية والحزم

فاهيتا: جاموسية؟ جاموسية إيه اللى بتقولوا عليها.. يكونش قصدكو ملوخية.. هى الريحة وصلت لعندكو.. اتفضلوا دنا طشة الطشة وفاشة الفاشة، بس معلش عملاها قرديحى عشان الكولوسترول.
مستر xyz: لا مفيش وقت للملوخية.. إحنا عايزينك فى موضوع مهم للغاية.. موضوع يتعلق بالأمن القومى.. وانتى عارفة الأمن القومى مبيحبش الملوخية إلا إذا كانت بالأرانب.



5_فاهيتا تستمع إلى مستر xyz باهتمام بالغ

مستر xyz: بصى يا أبلة فاهيتا.. إحنا عارفين إنك ست وطنية، وبتسمعى كل يوم أغنية يا حبيبتى يا مسر يا مسر على راديو 90 - 90، وعايزين نقولك إن البطة اللى جتلك النهارده دى مش بطة عادية دى بطة جاسوسة ودولة ماسونيا بعتتها ليكى عشان تعرف منك سر عمل الكشرى وإنتى طبعا ميخلصكيش إن دولة ماسونيا تعرف سر الكشرى وتحاربنا فى أكل عيشنا.
فاهيتا: بقى البطة دى بنت الإية جاسوسة.. أنا تحت أمرك يا بيه.. أنا قررت مرحش ولا أسافر وطز فى البوكت مانى.. دنا حتى مكنتش عايزة أسافر عشان ألحق أعمل شيرز للبت كركورة قبل الشتا ما ييجى.




6_مستر xyz يسترسل فى حديثه وتبدو ملامح الدهشة والاهتمام على ملامح فاهيتا

مسترxyz: لا طبعا إحنا عايزينك تسافرى عشان نظبط شبكة الجاسوسية دى كلها والفرصة جت لنا النهاردة لما البطة الجاسوسة دى جتلك.. واحنا متعقبين العملية التجسسية دى من زمان، والقصة بدأت لما القرش المفش الجاسوس المعروف جه مصر برسالة مشفرة ورسى على سواحل البحر الأحمر وسلم الرسالة للحمامة الموكوسة اللى سلمتها بدورها للبطة الجاسوسة، وأكيد الشبكة دى كبيرة جدا واحنا عايزينك تسافرى دولة ماسونيا عشان تسرقى ملف الجواسيس اللى فى مصر وتبعتيه لينا.
فاهيتا: طب افرض لو فتشونى فى المطار ولقوا معايا الملف هعمل إيه؟




مستر X yz: متخافيش يا أبلة فاهيتا احنا هنعلمك لغة الشفرة وقبل ما تروحى المحاضرة هتروحى على المكتبة الوطنية الماسونية فتسرقى الملف وتحفظى اللى فيه، ولما المحاضرة تتذاع فى التليفزيون إبقى قولى لنا المعلومات كلها فى المحاضرة بلغة الشفرة وبالشكل ده نعرف كل حاجة منك وإنتى هناك.
فاهيتا: لغة الشفرة؟ مع إنى مبحبش مطعم أبوشفرة بس كله يهون عشان «مسر» أوكيه إكس لانس يوووه قطيعة.. أوكيه xyz أنا هذاكر كويس وأحفظ لغة الشفرة وأمرى لله.. أسيبك أنا يا xyz عشان ألحق آخد تعسيلة قبل ما يجى ميعاد الطيارة وخيبتى تبقى تقيلة.
7_تبدأ فاهيتا فى فهم ما يدور حولها وتتحمس للمهمة



8_ فاهيتا تدخل فى النوم وتغوص فى الأحلام

الشيخ رفاعة: فاهيتا يا بنتى.. أنا عمك رفاعة الطهطاوى أنا عارف إنك رايحة بكرة فى مهمة وطنية كبيرة.. بس أنا عايز أقولك إن مهمتك الكبرى مش فى ماسونيا دى هنا فى مصر.. تل عبيط أمانة فى رقبتك يا فاهيتا.. المهمة فى تل عبيط.




9_فاهيتا تستيقظ من نومها ومازالت أجواء الحلم تسيطر عليها

فاهيتا: قطيعة هو مفيش غير فاهيتا فى البلد اللى كل شوية يشغلوها فى المهمات دى.. كده مش هلحق أخلص الشيرز للبت كركورة قبل الشتا.




10_فاهيتا تصل إلى المطار وتجد فى استقبالها الجاسوس الدولى المعروف «القرش المفش»

القرش المفش: أخلا وسخلا ست فاهيتا.. إحنا كتير متشوقين ليكى.. هنطلع دلوقتى على المقر الرئيسى اللى هتلقى فيه مخاضرتك وهتشوفى المكتبة الوطنية الماسونية عشان تعرفى إحنا مهتمين بمصر والمصريين قد إيه.. بس سامحينى يا ست فاهيتا، أنا مش هقدر أستمع لمخاضرتك عشان لازم أرجع مصر بعد زيارة المكتبة على طول، لأن عندى مهمة مستعجلة.
فاهيتا: لا أبدًا يا شوشو.. إنت حتى ممكن تسيبنى فى المكتبة وتمشى عشان أسلك نفسى وأسرق الملف وأجرى.. يوووه.. قصدى أسلق العدس للكشرى.




11_فاهيتا تلقى المحاضرة الخاصة بها فى دولة ماسونيا

فاهيتا فى التليفزيون: أما الكشرى بقى يا حبايبى يا حلوين فطريقة عمله سهلة خالص.. تجيبو الرز وتحمروه فى زيت كافور كفران، المكرونة تغسلوها كويس بسلك المواعين وبعدين تحطو عليها عدس بجبة من النوع المسوس عشان السوس يعمل طرقيعة فى السنان وقت الأكل.. وبعدين تحطوا على وش الطبق شوية كاتشب ولو ملقتوش الكاتشب حطوا شوية لاكيه أحمر من عم سمير الموان.. وبعدين ترشو على الطبق شوية «دقة» والدقة دى عبارة عن مية نار.. أو حمض كبريتيك مركز مخلوط بنشارة خشب وبالهنا والشفا لشعب ماسونيا الفاساكونيا.




12_مستر xyz يستمع إلى محاضرة فاهيتا عبر التليفزيون وتنتابه حالة من الفرح والانتصار

مستر xyz: عملوها الوحوش.. عملوها الوحوش.. أبلة فاهيتا ضللت شعب ماسونيا وإدتهم طريقة عمل الكشرى غلط ومش كده وبس.. دى كمان دلتنا على أعضاء شبكة ماسونيا فى مصر.. يلا بسرعة هنجهز القوات عشان نقبض على أعضاء الشبكة كلها.. شكراً يا فاهيتا.. شكراً يا فاهيتا.



13_مستر xyz جالس فى مكتبه ويدخل عليه «أحول أسطرطر» عمدة تل عبيط

أحول اسطرطر: يا باشا يا باشا.. أنا أسمى أحول اسطرطر عمدة تل عبيط.. فيه مصيبة حصلت.. فيه واحدة اسمها فاهيتا شوفتها فى تليفزيون دولة ماسونيا بتقول لهم على طريقة عمل الكشرى وبتسرب أسرار مصر العظمى، أنا اكتشفت الاكتشاف ده لوحدى وقلت للناس كلها عليه بس انتو لازم تحققوا فى القضية وتقبضوا على فاهيتا فى المطار.



14_تظهر على مستر xyz ملامح الضيق والغيظ من غباء «عمدة كفر عبيط»

مستر xyz: الله يخرب بيتك هتبوظ لنا العملية.. كشرى إيه يا اسطرطر.. هو فيه كشرى بمية نار.. أنت غباءك نادر ولازم نتحفظ عليك عشان ندرس حالتك دى لأنها لو انتشرت فى مصر هتبقى مصيبة سودة.



15_مستر xyz يقف وبجواره أعضاء شبكة الجاسوسية بعد القبض عليهم

مستر xyz: شكرا ليكى يا أبلة فاهيتا على مجهودك فى القبض على شبكة التجسس الكبرى.. إحنا هنكرمك ونديكى وسام الشركة الوطنية لمكافحة الجاسوسية، وكمان أنا عايز أشكرك لأنك كشفتى لنا على نوع من البشر عايش فى تل عبيط عنده غباء نادر وجارى فحصه ودراسة حالته عشان نطهر البلد من الأشكال دى.. تقدرى تروحى دلوقتى وتكملى الشيرز لكركورة.




16_فاهيتا فى طريقها إلى مهمتها الجديدة

أبلة فاهيتا: لا.. أنا بعد ما دقت الوطنية وحاربت رجال الماسونية وطهرت بلدى من الجاسوسية لازم أنفذ وصية الشيخ رفاعة الطهطاوى وأروح أنقذ أهلى من الغباء والجهل، دلوقتى بس عرفت إن مهمتى الحقيقية مش فى ماسونيا مهمتى فى «تل عبيط».. صدقت ياشيخ رفاعة.. المهمة فى «تل عبيط».







رسوم أحمد خلف