محمد زكريا حبيشى يكتب: وإحساس فيّا متبعتر

وإحساس فيّا متبعتر
وضلمة ساكنة ف شروقى
شوارع يأسى تستكتر
تدوب ضحكايه ف عروقى
دموع ف القلب مرشوشة
شروخ جوايا منقوشة
وأحزان فيا مفروشة
وامتى يا دنيتى تروقي

وبتغرب ما بين نـَفسى
وتايه بين حواريها
وليه يا قسوة ليه تِنـّسي
تسيبى غنوه يوم فيها
تخفف كسرِتي وجرحى
تبدّل دمعتي بفرحي
تداوى الهمّ وجوارحي
ووسط الشوق أداريها

ألملم ضحك متكسر
واركب ضحكة فوق ضحكة
ولكن قلبي يتأثر
وغرقان جوه ميت بركة
وأنادى حد يلحقني
ومن جوايا يسرقني
ولا يبعد ويسبقني
ولا يبقى الأنين تركه

مفيش غير غدر صاحبني
وشوق جوايا عاش خايف
وليل الحزن ساحبنى
وشايف بس مش شايف
و صار قلبى مالوش عنوان
ودايق كل ثانية هوان
يحاول يلقى فيّا مكان
ولكن لسه مش عارف