كريم العجمى يكتب: يا بن بلدى.. ابنى بلدى

يا بن بلدى ..... ابنى بلدى
لاجل بنتك ..... لاجل ولدى
مصر قبل اديتنا ياما
جه معادنا الوقتى نِدٍّي
محتاجانا نِشد حيلنا
مش ننام أو يوم نِهدِّى

يا بن بلدى ..... ابنى بلدي
واصحى من الغيبوبة فوق
كتفى بكتفك .... صفى بصفك
نرجَّع كل أمل مسروق
علِّى الهمة .... حِب بذمة
ارفع راية بلدك فوق

يا بن بلدى..... ابنى بلدي
واهدم أى جدار يحوشك
ابنى وازرع.... علِّى واصنع
خلِّى مصر ما بين رموشك
اقطع أى إيدين تخرَّب
حُط ايديك فى ايدين جيوشك

يا بن بلدى ..... ابنى بلدي
إحنا فى بداية الطريق
بص شوف تاريخ حضارتك
وارسم مستقبل يليق
مش لوحدى ومش لوحدك
خلِّى بينا روح فريق
يا بن بلدى.... ابنى بلدي
لاجل بنتك..... لاجل ولدى