بيتر بدوى عطيه يكتب: بلدى يا بلدى

بلدى يا بلدى
أنا عاوز أعيش ف بلدى

بلدى يا بلدى
أنا عاوز أربى ولدى

ف بحورك مركبى تايه
والموجة مسيرها تهدى

بلدى يا بلدى
أنا عاوز أعيش ف بلدى

بلدى يا غالية
ليه أبقى الحيطة المايلة

ويفيض بيا وأهاجر
والعيلة تصبح جالية

بلدى يابلدى
أنا عاوز أعيش ف بلدى

بلدى يا بلدى
أنا عاوز أربى ولدى

بلدى يا حبيبتى
عاوز أصلى ف كنيستى

لا شظية تخطف بنتى
ورصاصة تقتل ولدى

بلدى يا بلدى
أنا عاوز أعيش ف بلدى

بلدى يا دارى
النور خاصم نهارى

وأنا مين يطفى نارى
ويوماتى ميتم عندى

بلدى يا بلدى
أنا عاوز أعيش ف بلدى

بلدى يا أهلى
عمرى فداكى وتستاهلى

نبض ترابك يندهلى
راح اخطى النار واعدى

بلدى يا بلدى
أنا عاوز أعيش ف بلدى

بلدى يا أمى
لونى توبك من دمى

خافى عليا واهتمى
يا أغلى حاجة عندى

بلدى يا بلدى
أنا عاوز أعيش ف بلدى

مش خايف يا بلدى
من قنبلة تنسف جسدى

راح أموت وأنا قبرى ف حضنك
دا محدش حبك قدى
يا بلدى يا بلدى