أحمد عبد الغنى يكتب: الزمالك والإخوان!

ياجماعة حد هيسألنى يا كابتن هو فى علاقة بين الزمالك والإخوان؟ أرد وأقوله طبعا حبيبى دا العلاقة واضحة زى الشمس.. هيقولى إزاى ياكابتن؟ أشرح لكم بقى:

الزمالك وكالعادة غاوى لا مؤاخذة ينكد على جمهوره فى كل مناسبة وفى كل عيد ومفيش فرق بين عيد رسمى أو قومى أو حبى أو عيد إسلامى أو عيد مسيحى.. عيد كبير.. عيد صغير.. عيد ميلاد.. عيد قيامة.. مولد نبوى.. عيد رأس السنة الهجرية.. الكريسماس شغال.. فى عيد الحب برضه شغال.. كله نكد فى نكد مفيش مرة بيجلى.. هزيمة محلية أو أفريقية أو دولية.. كله شغال.. ولافارقة مع فرقة الزمالك معاهم مين بيدربهم حسن شحاتة ولا جوهرى ولا حسام ولا طولان ولا مين بيلعب فى الفريق من لاعبيه حازم إمام ولا إبراهيم يوسف ولا إسماعيل يوسف ولا جعفر ولا غيره.. متعودة.. دايما..

والزمالكاوية يا عينى لازم يأخدو جايزة الصبر فى الملاحات عن أحسن جمهور صابر ومستنى الفرج (زيه زى الشعب المصرى الغلبان اللى لسه مستنى نتائج الثورة)، المهم الجمهور بتاع الزمالك ياعينى عليه على طول عايش فى نكد وبرضو عايش على أمل وبقاله يجى سبع تمن سنين يقولك الزمالك قادم ويقولك عائدون وراجعون.. وفى الآخر هم بيحزنوا..!!

وزى ما الزمالك بينكد على جمهوره نلاقى برضو الإخوان بيعملوا كدا بالظبط.. بس بينكدوا على الشعب المصرى كله مش على جمهورهم وبس.. يعنى الوفيات والإصابات عندهم كل يوم بتزيد وهم مستمرين.. وموضوع نكدهم على شعب مصر مش جديد عليهم.. لأنه مستمر من أول وجودهم بأغتيالهم لبعض الشخصيات السياسية فى مصر وكان أهمها طبعا الرئيس الراحل السادات اللى مات على إيدى فصيل منهم.. واستمروا فى كرههم لمصر والمصريين وبرضوا لما وصلوا السلطة واستولوا عليها بعد فوز محمد مرسى المشكوك فيه بالرئاسة برضو فضلوا يخسروا فى الناس من حواليهم ويزودوا فى الكره والعداوة اللى بينهم وبين شعب مصر وبقوا هما فى جانب والشعب المصرى فى جانب تانى خالص.. وبقى مبدأهم من ليس منا فهو علينا (لا مؤاخذة)!

وزاد الإخوان فى النكد على شعبهم وعلى شعب مصر بعد عزل مرسى وبدأوا فى أعتصام رابعة والنهضة وبدأت أعمالهم التخريبة والتحريضية والتدميرية فى البلاد من شرقها لغربها ومن شمالها لجنوبها.. وبدأ الجناح العسكرى والتخريبى بتاعهم فى الشغل.. انفجارات وعربيات مفخخة وضرب كمائن للشرطة وللجيش وحرق عربيات وتعذيب مواطنين أبرياء وحرق كليات وتعطيل امتحانات وتعطيل المواصلات والطرق والكبارى وحرق المنشآت العامة للدولة وأقسام بوليس وحرق كنائس واعتداء على جوامع وغيره وغيره من أعمالهم التخريبية.. ومبقاش فارق معاهم برضو عيد كبير أو صغير.. عيد مسيحيين أو مسلمين ولا طفل أو شاب أو فتاة أو عجوز.. المهم أنفسهم وبس.. وتنفيذ مخططهم لحرق البلد والنكد على المصريين.. وبقى مبدأهم لو معرفتش أحكمهم.. أنكد عليهم واقتلهم.. وبقى النكد والحزن فى كل بيت فيكى يا مصر.. علشان فى ناس بتموت منهم وبرضو ناس بتموت من المصريين!!

عرفتم بقى يا متعلمين يا بتوع المدارس إيه وجه الشبه بين الزمالك والإخوان.. هو النكد.. مع الاختلاف البسيط أن الزمالك بينكد على جمهوره وبس اللى متعود على كدا.. إنما الإخوان بينكدوا وبمنتهى الكفاءة على شعب مصر كله.. اللى مش متعود على كدا!