الزوج: إنتى السبب فى فشل حياتنا عمرك ما بتحمدى ربنا دائما بتبصى لغيرك شوف ده اشترى ايه.. وأختك لابسة طقم جديد.. أمك بتنكد على وبتبص ليه من تحت لتحت "قرفتنى وسودت حياتى وفى الآخر عايزة تخلعنى.
الزوجة: دائما بتتحجج بالشغل وانى بنكد عليك وانى السبب فى عدم قدرتك على الجلوس معايا فى مكان واحد وإعطائى حقوقى الشرعية فعلا انت يا "طارق"كداب كبير وأكبر غلطة عملتها فى حياتى".
هذه الكلمات قالها كل من "طارق. ح" و"سميرة "بعد أن توجه الزوجان لمكتب تسوية المنازعات بمحكمة الأسرة بروض الفرج، ليقوما بتوجيه وصلة الاتهامات كل منهما للآخر، وبعدها طالبت الزوجة بالخلع والخلاص من هذه الورطة، وأصر الزوج على رفض ادعاءاتها وعدم انفصالهما.
أضافت "سميرة" قائلة: للأسف بعد قصة حب أربع سنين فى الجامعة نعيش الآن بعد زواج دام سنة فقط أكبر قصة فشل فى الحياة.. بسأل نفسى هو الحب راح فين مش بعرف أجاوب، كل حاجة اتغيرت بعد مرور أول شهر زواج، واكتشفت أنى كل اللى عشته أنا وهو أيام الخطوبة كان وهم وكلام فاضى.
وتابعت: حياتى كانت عبارة عن نكد وتوتر كل اللى كان مسموح أصبح من المحرمات، النوم والأكل بميعاد ولما أحب أروح أفك عن نفسى عند أمى وأهلى شوية، تقوم القيامة كرهت الزواج وكرهت نفسى وكل اللى اتصورته لقيته سراب واكتشفت إنى مغفلة كبيرة انى اتجوزت، منه لله ضيع كل السعادة اللى كنت هديها ليه لو كان عاملنى بما يرضى الله.
وواصلت: حتى حقوقى الشرعية رفض إعطاءها لى بحجة إنى منكدة عليه، ورغم أنى كنت بهتم بنفسى اتهمنى بالتقصير معه أمام حماتى، بس والله العظيم ربنا يعلم انى حافظت على نفسى وجمالى أكتر من قبل الزواج، بصراحة هو السبب فى هدم البيت.
فيما علق "طارق "ردا عليها: كنت بحبها جدا وكنت هموت وأخليها تكلمنى، ومن يومها تنكة وطلعت عينى علشان توافق وأخطبها، لكن يعلم ربنا انى دلوقتى بلعن الساعة اللى وافقت فيها على الستات دول حاجة فظيعة واتأكد بعد جوازى انى اللى يتجوز بصراحة يبقى.. آه والله مالها عشت العزوبية راحة لا فى حد يقرف ويقولك رايح فين وجاى منين وكل شوية يطلعك مائة حاجة عند حضور المرتب والمصيبة اللى تخلى أى زوج يتجنن "والدتك عملت وعلقت وقالت وضحكت " حاجة خنقة من الآخر.
واستطرد "طارق": أنا عشت معاها سنة بس يعلم ربنا انى حاسس انى قعدت معاها مائة سنة منها لله.
وعلق "طارق" على ادعاءات زوجته بما نسبته إليه بشأن تقصيره فى إعطائها حقوقها الشرعية قائلا: أكتر حاجة صدمتنى انها طلعت بالأخلاق دى وانها تخلت عن كل الحب والعيش والملح واتكلمت مع كل الناس فى أسرار البيوت بس الحمد لله أنها ظهرت على حقيقتها فى الأول قبل ما نجيب ولاد فعلا الحب مش كل حاجة لازم الواحد يختار اللى عندها دين وأصل وأخلاق بس انا هطلع عينها قبل ما أطلقها وهخليها تتربى مهو الجواز مش لعبة.
فيما حكمت المحكمة بعد فشل جلسات الصلح وإصرار "سميرة"على الخلع فى الدعوى التى أقامتها وحملت رقم 2314 لسنة 2013 بالتفريق بين االزوجين.
للمزيد من أخبار الحوادث..
الإخوان يقطعون الطريق العام "ههيا – الزقازيق" بالقرب من العدوة
ضبط 8 عناصر إخوانية بأسوان وبحوزتهم مولوتوف وشماريخ
مصرع شخص وإصابة 4 آخرين فى انقلاب سيارة بترعة الإبراهيمية بالمنيا
النيابة تحجز عامل ضبط بحوزته 23 قنبلة بدائية الصنع بالخانكة
