أشرف شعلة يكتب: ملحمة الشعب اللى كان!!

هو النصيب
بيصيب سهم اللى ناوى
واللى غاوى
واللى نفسه يكون
والزمن يا خلق يهون
والحياة أمواج
من يركب النهاردة
يكون غريق بكرة
واللى بيحب النهاردة
ممكن قوى يكره
هية كدة متقسمة
قسم وأسامي
وتقاسيم نغم بيعود
أحمد ده صوت الناي
خميس صوت القانون
إبراهيم ده صوت العود
أشرف صوت البيانو
أمين صوت الجيتار
إنجى صوت الإيقاع
أمل صوت الفيولا
الناس دى صوت الأوكورديون
والناس دى صوتها التشيللو
والناس دى بتدق ع الطبلة
والناس دى صوتها الصاجات
سيمفونية الحياة
ومسرح كبير
والجمهور ساعات بيفهم
وساعات يفضل يندمج ف الدق
جمهورنا الكلاس
بيسمع لكاظم
بيسمع لخيرت
بيسمع الأوبرا
وجمهورنا العزيز بيسمع أمينة
ويسمع لبوسى
ويركب الحنطور.. ويتسنتر
ويسمع أناشيد ومدح
ويحب صوت حليم
ويسرح مع ياسين
ويحب صوت رفعت
ويطربه صوت الأدان
ويرجع تانى يسمع
أديك فى أى شيء
مع إن
معندوش للأسف حاجة فاضية
كله أتملى وَش
بيرش ع الوشوش غش
ويهش من على وجهنا وش
مش بتاعنا
إحنا مين بقى؟؟
إحنا مين بقى؟؟

إحنا الشعب اللى قال
وانتفض رغم المحال
وإحنا أول شعب إنساني
حب الحياة
وإحنا الآثار والسنبلة فى أبيس
وحتحور وحابى وهاميس
إحنا اللى علمنا البشر معنى الحضارة
وعلمنا أى حاكم يعنى إية التهيس
إحنا اللى كنا زمان يضربوا بينا المثل
باقينا انتيكة.. دقى يا مزيكا "
وإحنا اللى أيام محمد على مكنتش أمريكا
وإحنا السيمفونية العشرين
لفان جوخ
واللوحة المية لبيتهوفن
وإحنا موسيقى الزار فى فرنسا
وإحنا موسيقى الجاز فى الواسطى
وإحنا الأهرامات المقلوبة
والحاجات المعكوسة من غير لزوم
وإحنا القاتل والقتيل
والفاعل والمبتدأ
وحروف العلة وأداة النصب
وإحنا الكادر اللى لامم الغلابة
ولامم الطبقة الغنية بزوووم
إحنا المسا
والأسي
وليل طويل ملوش فجر
وإحنا الحب والدفا والليالى الحمرا
وجرح الهجر
إحنا الصوت المخنوق من العايط
وإحنا الأمل اللى من زمان فايت
وإحنا التنطيط والهبل والقهر
وإحنا اللى ماتوا.. واللى باتوا.. واللى هاتوا
فى الميادين وقدموا دماهم مهر
إحنا يا جدع أجدع شعب
طلع القمر فى الأغاني
واتصور مع البدر