أحمد عبد الغنى يكتب: يا حلاوة المولد..!!

تتغير الأزمنة وتتبدل الأحوال من حال إلى حال ويبقى المصريون لا يتغيرون ولا يملون، تنتقل البلاد من الملكية إلى الجمهورية ومن هزيمة فى 48 وعدوان ثلاثى فى 56 ونكسة فى 67 ونصر فى 73 وهم لسه مكملين.. يموت عبد الناصر ويغتال السادات ويتخلع مبارك ويتعزل مرسى.. وإحنا لسه زى ما إحنا.. وتفوت علينا المحن والمصايب والإفلاس والأزمات الاقتصادية وبرضو ما بنتغيرش.. مكملين عاداتنا وتقاليدنا وربنا ما يقطع لكم عادة.. يبقى المصرى معروف بجبروته وقوته.. فى الشدة شديد وفى القوة قوى.. يبقى المصريون متميزون عن العالم والحمد لله فى احتفالاتهم بكل مناسباتهم وتحويلها من مظهر دينى إلى مظهر الولائم والعزومات واتفرج يا سلام على حلاوة زمان.. عروسة وحصان.. وكحك وبسكويت ورقاق.. وفتة وكوارع وممبار.. وعاشورا معاهم كمان..!!

يشتكى المصريون من سوء الحالة الاقتصادية الآن ووجود إضرابات عمالية واعتصامات ومطالبات فئوية بزيادة الدخل والأجور وكادر المعلمين والأطباء وغيرهم وبرضو مع كده مكملين لازم نجيب حلاوة المولد لو هيحصل إيه.. لازمًا ولابد يا سى السيد تجيب للعيال علبة الحلاوة وتشكلها بقى بكل شىء.. بندقية.. حمصية.. فولية.. سمسمية.. لديدة.. جوز هند.. ملبن.. كله كله ومتنسأش أى حاجة للعيال تزعل، ويا سلام بقى لو فى عريس وعروسة مخطوبين يبقى واقعة أهله مطينة بطين لو مجبش للعروسة علبة الحلاوة ساعتها هيتقال عليه بخيل وهو ساعتها هيبرر موقفه ويقولك الاحتفال ده حرام.. وتقوم المشاكل والخناقات فى البيوت بسبب حلاوة المولد.. والحمد لله معظم الستات دلوقتى مش بيصروا كمان على العروسة للبنت والحصان للولد.. أخيرًا بنفوت حاجة فى مناسبتنا..!!

هكذا الشعب المصرى فى أسوأ الظروف وفى كل الأوقات اللى الناس بتقولك مش لاقية تأكل تروح تلاقى كل محلات الحلويات عاملة صوان وفرشة علشان حلاوة المولد، وكلهم بيستعدوا من قبل الميعاد بحوالى شهر أو أقل.. البقالين ومحلات الحلويات حتى محل الألبان اللى فى شارعنا عاملة نصبة لحلويات المولد.. وتلاقى الاختلافات بين الناس وبين المشايخ فى الشوارع ما بين اللى بيحرم الاحتفال بالحلوى ومابين اللى بيقول جائز وتتعدد الفتاوى المصرية وتزداد الصراعات والخلافات وكأن الدنيا ناقصة خناقة على علبة الحلاوة.. لا حول ولا قوة إلا بالله.. هو ماينفعش نحتفل من غير غرامات وفلوس وحلويات وأكل.. هو كله أكل أكل.. مفيش تبرعات مثلاً للأيتام والأرامل.. مفيش تبرعات للمساجد.. طب مفيش علبة لجارك الغلبان اللى بيبصل لك وأنت طالع بالعلبة ونفسه يدوق عياله منها.. طب مفيش كلمة كل سنة وأنت طيب لأخوك وقريبك وصاحبك فى العمل أو لجارك!!

حلوة الاحتفالات وحلو أن إحنا نضحك ونخرج من همومنا ونفرح بعضنا.. بس مش حلو الإسراف والتبذير ومش حلو نسيان الأهل والجيران.. احتقلوا وافرحوا يا مصريين.. بس متنسوش أن النبى وصى على سابع جار ووصى على صلة الأرحام ووصى على التعاون والتراحم بينا ووصى على اتباع سنته.. فاتبعوه يرحمكم الله..!!