المؤبد لقاتلة زوجة ابنها.. "طلعت الشيطان اللى جوايا وقتلتها"

"مش بيقولوا الحمى عمى، فعلا الكلام ده طلع صح، وكان شعار (مها) مرات ابنى، رغم إنى عاملتها ذى "بنتى" كنت أقوم بكل شغل البيت وعمرى ما اتأخرت عليها، لكنها كانت "حاطنى على راسها"، وسودت حياتى حتى الأكل كانت بتخفيه منى، وضربتنى، وفى الآخر طردتنى من البيت فى عز الليل ومكنش لى حد أروح ليه، منها لله أهى فى إيد اللى خلقها هو اللى ياخد حقى منها".

هذه الكلمات قالتها "نعمة.س" أثناء نظر القضية التى تحمل رقم 7865 لسنة 2012، التى اتهمت فيها بقتل زوجه ابنها "مها.عبد الرءوف" أمام محكمة جنايات الجيزة.

وأضافت "نعمة" أمام المحكمة: "أنا اللى اخترتها وأقنعت ابنى أنه يوافق يتجوزها، لكن المعروف متمرش فيها فلم يكن أمامى حل غير قتلها فهى الشر الذى قمت بزرعه فى حياتى، فهى متسلطة وعنيفة منذ أول يوم خطوبة قامت بوضعى فى دماغها، وكانت تغير بصورة فظيعة على ابنى حتى منى أنا، والله العظيم أنا كنت كل اللى بتمناه فى سنى ده إنى أعيش وأشيل ولاد ابنى وأموت وهما فى حضنى، لكنها حرمتنى من عيش حياة سعيدة فى آخر أيامى".

وتابعت "نعمة" "لم تتركنى فى حالى صبرت وتحملت شخصيتها المريضة بسبب حبى لابنى وخدمتها كنت بغسلها وبعملها شغل البيت وهى قاعدة كانت تأمر وأنا أنفذ كنت بعتبرها بنتى اللى ربنا حرمنى منها، وعمرى ما كنت أظن أن فى واحدة عقلها صغير، هى اللى دفعتنى لقتلها من كتر عمايلها معايا، بعد طردها لى من البيت اللى بنيته من شغلى وفرشته علشان واحدة غريبة تيجى وتاخدوا منى وطردتنى منه منها لله، فى عز الليل خرجت معرفتش أروح لمين وابنى وقف ساكت علشان خايف من لسانها الطويل.

فيما سردت المتهمة تفاصيل الليلة التى قتلت فيها المجنى عليها "مها" قائلة: "بعد ابنى ما خرج لشغله روحت علشان أترجاها ترجعنى أعيش وأقسمت لها على المصحف إنى مش هزعلها تانى وبوست أيديها، راحت ضربتنى برجلها ووقعت على الأرض كان منظرى يكسف، وأنا ست كبيرة، وقولتلها طب خلينى أقعد مع ولاد ابنى التوأم رفضت، بصراحة مقدرتش أمسك نفسى خنقتها بالحبل وطلعت روحها، وكنت فى غاية السعادة وانتقمت منها بعد كل اللى عملته فى وحرمتنى من أغلى حاجة فى حياتى ولاد ابنى، وفرجت الناس علىَّ، كل اللى ندمانة عليه هو زعل ابنى منى دلوقتى ورفض أنه يكلمنى، بس هى كانت تستاهل تموت مقتولة طلعت الشيطان اللى جوايا بسبب عميلاها.

واستطردت "نعمة" فى بكاء: "مبقاش فارق معايا كل حاجة راحت منى وهى السبب ياريتها عاملتنى بما يرضى الله واعتبرتنى أمها".

قضت المحكمة بعد سماع الشهود وتقرير الطب الشرعى الذى أثبت ارتكاب المتهمة "نعمة" قتل المجنى عليها "مها" عمدا عن طريق خنقها بـ"حبل"، مما أدى إلى وفاتها فى الحال "بالمؤبد 25 عاما مع الشغل".

للمزيد من أخبار الحوادث
إصابة تسعة مواطنين فى حادث تصادم سيارتى أجرة بكوم أمبو


القبض على إخوانيين خلال تصويرهما قسم أول العاشر بالشرقية


ضبط عامل هارب من حكم بالمؤبد وآخر مطلوب فى جناية قتل بقنا