هند كمال تكتب: الحقيقة فى نظرى

من حق الشعب أنه يغير نظام حكمه ويعيد بناء بلده بالطريقة اللى هو عاوزها.
من حق الشعب أنه يعيش زى ما هو عاوز.
من حق الشعب أنه يحمى أرضه ويدافع عن تراب بلده.
من حق الشعب أنه يثور على فساد هو شايفه ولامسه.
من حق الشعب أنه يقرر مصيره بأرادته وبدون أى ضغط من أى أطراف.
من حق الشعب يقول لا.
لكن مش من حقك تحبطنى.
مش من حقك تكمم أفواهى وتقمعنى لمجرد أنى بقول للظلم لا.
مش من حقك تضيع بلدى وتكبش منها زى ما أنت عاوز. وتمشينى على مزاجك ومش عاوزنى أقول لا.
مش من حقك تقتلنى لمجرد انك تعيش.
مش من حقك تمحينى وتروعنى علشان متمسك بكرسى هو فى الحقيقة ملك الشعب وللشعب.
مش من حقك ترفع فى وشى السلاح حفاظا على كرسى يلمعك فى الدنيا ويجحمك فى الآخرة نتيجة استخدام بسوء.
مش من حقك تحكم شعب غصب عنه , ده ربنا خيرنا فى عبادته وفى الآخر هيحاسب كل واحد , تيجى انت يا بشر تغصبنى على أنى أقبل ظلمك وحكمك وفسادك ويا كدة يا الموت ؟؟؟

سوريا قامت فيها ثورة شعب , ناس هتفت ضد ظلم , ناس حلمت ببكره أحلى لبلدهم , فجأة لاقينا (جيش حر) , فجأة لاقينا (لاجئين) , فجأة لاقينا (إخوان إرهابين وأمريكا وأوباما).!!!!

قمع وقتل ودمار بلد كامل وقتل للنساء والأطفال وبكل الطرق الوحشية والمحرمة دوليا كالكيماوى.
الحقيقة أنا كنت من المعتقدين إن كل اللى بيحصل فى سوريا ده سببه بشار واعتقدت برده أن الجيش الحر ده جيش سورى ثورى مناضل من قلب سوريا هدفه حماية بلده وبيحب تراب بلده وبيدافع عن الشعب السورى الحر الثورى ولكن حكم الإخوان فى مصر كشف لينا الحقيقة وهى (( لعبة أمريكا ))..ما هى ((لعبة أمريكا )) ؟
لعبة أمريكا دية عبارة عن أجندة كبيرة جدا ومن سنين بيتم التحضير ليها , مخطط كبير ومدروس ومدعوم من إسرائيل وتركيا وألمانيا وفرنسا والدنمارك ووو.. إلخ من كتير من دول العالم.
المخطط ده عبارة عن تقسيم الوطن العربى إلى دوليات عشان أمن إسرائيل بحيث إن إسرائيل تكون الدولة الأقوى فى المنطقة العربية _ ولو إنى مش معترفة بأن إسرائيل دولة أساسا ولكن ده مخططهم _ وإن اللى يحكم كل الدوليات ديه هما جماعة الإخوان المتأسلمين الإرهابين العملاء اللى أمريكا راعى ليهم وبكدة تكون أمريكا سيطرت على الوطن العربى بعملائها وخلت إسرائيل القوى العظمى فى المنطقة العربية مع احتفاظ امريكا بنفسها بانها القوة العظمى فى العالم.
والمخطط ده بقى بدأ تنفيذه من ايام العراق.
اعتمدوا على استغلال الثورات العربية وتحويل مسارها اليهم لتنفيذ المخطط.
لما شعب مصر العظيم قام بثورة 30 يونيو واطاح بالاخوان الارهابين المتأسلمين العملاء , انكشف المخطط الامريكى الدولى وانكشفت الحقائق كاملة وبوضوح واوباما من الآخر خسر معركته فى مصر.

عشان كدة انا متأكدة مليون فى المية ان سوريا تواجه الارهاب الدولى زيها زى مصر.
الجيش الحر هو جيش امريكى اخوانى حمساوى عميل ارهابى ممول من امريكا وحلفائها.
بشار مش برىء وزيه زى مبارك ومرسى ولكن امريكا بتدمر سوريا وده المؤكد وعشان كدة لازم الكل يواجه الارهاب.

انا مع سوريا ضد التنظيم الارهابى الامريكى الدولى وربنا يحفظ سوريا والوطن العربى.