مؤيدو الإخوان و"النور" يشنون حربًا على تويتر..أنصار الجماعة: تعلمنا منهم إن الاسم عمره ما كان على مسمى.. والسلفيين: تعلمنا من الجماعة "السمع والطاعة حتى لو مش موافق" وإن كل اللى يعارضك يا كافر يا عميل

شن حزبى "الحرية والعدالة" الذراع السياسى لجماعة الإخوان المسلمين، وحزب "النور" السلفى حربًا ضد بعضهما البعض، على موقع التواصل الاجتماعى "تويتر"، بإنشاء كل منهما "هاشتاج" لإبراز عيوب الآخر واتهامه بالتقصير والخيانة، فقام "الإخوان" بتدشين هاشتاج بعنوان "تعلمت من حزب النور" وتربعا "نادر بكار"، و"ياسر برهامى" على قائمة الشخصيات التى لاقت هجومًا إخوانيًا، فى مقابل هاشتاج "تعلمت من الإخوان المسلمين".

أثار الأمر ردود فعل قوية لدى نشطاء "تويتر" والتعليق على "الهاشتاجات" بشكل كبير، ومن أبرز تعليقات نشطاء "الإخوان" ما يلى: تعلمت من حزب النور إن مصر صباحها نور فعلاً لكن فى اﻷنشودة فقط وليس فى الواقع.

وتابعت التعليقات، حيث علق آخر ساخرًا: بصراحة ما تعلمتش بس قولت أزيط زى ما الكل بيزيط.. ولا أقولك اتعلمت.. تصدق برده متعلمتش حاجة.

ومن ناحية أخرى هاجم مؤيدو حزب "النور" جماعة الإخوان المسلمين من خلال هاشتاج "تعلمت من جماعة الإخوان المسلمين" ومن أبرز التعليقات التى جاءت: تعلمت من الإخوان المسلمين أن فوايد القروض مش ربا دى مصاريف إدارية، وأن اللى تلبس عباية لازم متكونش بكباسين.. الكباسين أصلا حرام، واتعلمت إنى اتهم غيرى بما هو فى من تمويل خارجى وخلافه.

وعلق آخرون ساخرين: اتعلمت من الإخوان إنى أرشق فى أى مصلحه، و لما تشيل البطارية من الموبيل محدش يقدر يتصنت عليك، أن كل اللى يعارضك يا كافر يا عميل يا ساذج سياسيا ومعندوش خبرة، وإنى مش عشان فشلت فى جزء من حياتى أيأس لا أبسلوتلى مرسى أفشل شخص خلقه ربنا وكان رئيس مصر عادى يعنى.

وأضافت التعليقات: تعلمت من الإخوان المسلمين سبوبة التجارة بالدين خلاص خلصت ادخلوا عليا بقى بالجديد الفقراء والمساكين والمهمشين، أتاجر بالدين وبالدم وباى حاجة حلال أو حرام، إن الكراهية لكل المختلفين مسألة مبدأ، والسب فيهم دليل الولاء، والسمع والطاعة حتى لو مش موافق ومش عاجبنى الكلام، هو أنا هعرف أكتر منهم يعنى، وإن أمريكا بتدعم الإسلام.