رفيدة محمد عبد المنعم تكتب : حبة كلام فى الهوا

بعد المحبة أمل
علقته على بابى
يا قليبى إيه العمل
لو غابــوا أحبابى
....

بعد المحبة سؤال
وعلامة استهجان
يا قليبى كيف الحال
لو خالى أو كسلان
....
بعد المحبة ضي
وطريق وصول بكرة
يا قليبي أنت الحي
بتـحب ولا تـكره
.....
عصفور كنارى مال
والميل هوى مكتوب
عصفــورى ميل قال
دوبت فى هوى المحبوب
....
سكب القوافى وسقانى
نيلى الجميل الأسمر
دوب فى كأس الأمانى
سهدى مع السكر
.....
يا ضل شجر التوت
يا نبتة الريحان
يا نيلى يا منحوت
فى قليبى والشريان
.....
مغارة فكر
ودوامة معانى
محبة وشوق وصبر
يا أسمرانى
وليل راسى
على قلبى كأنه
جبل ينهد لو شعرك نادانى
.....
بلاد الكدب والحيرة
بلاد غيرة مع استبداد
كلام الحب كان فيها
كلام ينعاد
بلاد أبعاد وفواصل
وشىء واصل للاستشهاد
.....
سكر من ضيي قام غني
و حب وداب وأتمنى
و لما ادن عليه الفجر
قال أشوفك بكرة فى الجنة
......
ما فيش رقة فى دي الكلمات
ما فيش حنية بتواسي
ولا في الصوت ولا النغمات
ما فيش غير الأسى راسى
......
الحب أحمر
بلون الدم والطيبة
وشىء حاضر
برغم الوحدة والغيبة
وشىء مكتوب ومتسطر
لا هو حرام ولا عيبة
.....
الحب طعمه زي طعم التوت
وضلة وارفة أمهات وبيوت
الحب جارح زي قطف الشوك
ومالوش دوا ولا بالبعاد والموت