زمنك دا ولى وراح
إنسى يعود لو يوم
العدل مش رواح
لكنه وسط غيوم
الطبل والتلميع
والكدب ع الشاشات
فاكرين هيلغوا ربيع
فى زحمة الخلافات
فوقوا يا افنديات
يا حاشية الملاعين
الثورة لسه ثبات
و قايله حقها فين
وقايله ييجى إزاى
سامعين يا متناسين
الشهدا حقها جاى
محلا الوفاء بالدين
لكن قليل الأصل
هيجيله دم منين
خان العهود.. والوصل
حبله معدش متين
ياشلة المدانين
جايين تلوموا مين
والبطحة فوق الراس
فاكرينَّا عميانين
منتوش رسل للحق
إحنا اللى متساهلين
لازم نسد الشق
ونحبس التعابين
سكة وماليها رجوع
لازم نقيدها شموع
فى أخرها راسى العدل
كاشف بصوت مسموع
إهتف وقول ياحياة
زى ماشوفت يوم
فيه خدت طوق لنجاة
وغيرى مات محروم
قسماً بعهد الله
لافضل على وعدى
حق اللى راح هيعود
لوكان على رقبتى
ووطننا يبقى نعيم
فاق الجمال والوصف
وشبابه يبقى عظيم
واحد فى أصعب ظرف.
شهداء مصر
مشاركة
اضف تعليقاً واقرأ تعليقات القراء
مشاركة
