باعرفها من زمان
ماضيها واللى كان
واعرف إن مالهاش أمان
مبادؤها فقاقيع كلام
وبتخبّط فى كل مكان
تتبنى حقوق الإنسان
وتهدر كرامة الإنسان
ما دام ماهوش مواطن فيها
ولا كرامته بتعنيها
نصّبت نفسها غفيرة
فى الصغيرة والكبيرة
وعاملة هيّا الأميرة
وسيدة الأكوان
بتنمى الإرهاب وترعاه
وتفترض فيه الموالاة
ولما يقلب عليها
ترجع تطعنه من وراه
من نفختها وتعاليها
كرّهت العالم فيها
وبيحاول دايما يؤذيها
ولما تحتاجه بيديها قفاه
بتتاجر فى الخسارة
وفاكراها شطارة
لو تحط الرهان
على حصان خسران
باعرفها من زمان
أيام ما كانت واحة للحرية
لا فيها ديكتاتورية
ولا تعرف شمولية
ولكل مجتهد فيها مكان
دلوقتى حاطة مناخيرها
فى شئونها وشئون غيرها
ويا الناس تمشى على كيفها
يا تحرمهم من خيرها
خيرها اللى راح وراحت أيامه
وانتهى وقت الرخا وأحلامه
وراحت أيام زمان
وممكن يرجع اللى كان
لو قفلت بابها على نفسها
وحلّت مشاكلها الداخلية
اللى بقت مزمنة ومستعصية
على كل الحلول التقليدية
ومحتاجة جهد وعرق واتزان
علشان ترجع زى زمان
وياريتها ترجع
صورة أرشيفية
مشاركة
اضف تعليقاً واقرأ تعليقات القراء
مشاركة
