رفيدة محمد عبد المنعم تكتب: مربعات بنت الصعايدة

أنا بنت أهلى صعايدة
كالوردة عطر ونضارة
فلاحة كالشمعة قايدة
وتشع بهجة وحضارة
.....
ليه يا زمانى تاكلنى
ع القسوة وأهل الغشاوة
سايب همومى تاكلنى
ده لؤم ولا غباوة
.....
حبة كلام ع الورق
وسنين بتتبخر
الصدق داب واتحرق
والكدب فرعه أخضر
.....
ولا فارقة عند الخلايق
مسحورة أشكى فتونى
الأمر ليك ياللى خالق
مشيوا ووحدى فاتونى
.....
بالسبحة طيبت قلبى
ورقيته من كل حاسد
صدقتوا كل اللى قال بى
عن قلبى طامع وفاسد؟؟
.....
كان قلبى شبه اللمونة
صابحة تداوى العلايل
ياما العوازل لمونا
وكدبنا فيكوا القبايل
.....
صدق الكلام كدب صافى
والفعل صدقه ويقينه
كان قلبى كالبحر صافى
وأبيض وناعم وفينه
.....
أنا كان لى حلم ورويته
والمولى عالم بحالى
لا كدبت فى اللى رأيته
ولا راح أكدب خيالى
.....
وعليكو ألفين سلام
ياللى خطفتم قليبى
أنا اللى جابنى الكلام
ما الشعر ضعفى وعيبى
....
مفتون بحاله ده الزول
ويقول ملكت المعانى
كله كلامك إلى زول
وحدك هتفضل تعانى
....
بيقولوا صدقتى شاعر
الشعر كداب فى أصله
مانا قلبى يا خلق شاعر
صادق فى هجره ووصله
.....
شكرا لهجر الحبايب
رجعنى للسبحة دغرى
يارب أنا عبد تايب
والعفو والرحمة تغرى
....
بعدى عن الله هلكنى
أتمنى قربه وجاره
يارب حبك ملكنى
وسعيد مين الله جاره