بلاش تكتب أسامى

أدى وش لبلطجى
ووش تانى لواد حرامى
ووشوش عُرْضَة للضياع
ووش شيطانى وانتقامى
ووش كمان بألف وش
حرباوى موت
وساعات سيامى
ف خدلك لقطة للوشوش
بس والنبى ما تقول أسامى!!

وافضح فينا
يالله افضح
دا أحنا حالنا بقى شين ويكسف
محتاجين لطوفان يُجْْرُف
وسيل يشيل
مقلب العفن اللى فى الدماغ لسة باق
م الرأس اللى جوَّه القصر
للكسر اللى ماشى تايه فى الشوارع
للبواقى..

آآآآآآآآآآآآآآآآآآآآآآهين من احتراقى
والغضب اللى فىَّ
من ملك تاجرنبيذ
لوزرا تُجَّار معيز
لأغبيا خلُّونى أتْرحَّم على أيام لانجليز
لعالم بيبوح بالعهر
وبيطفى نورى
ويحتفل بميلاد ظلامى
وإحنا بنغنى ونقطِّع فى قلوب بعضنا
ونضحك
بس بنخبِّى الأسامى!!

ونتاجربملايكة تحت الكبارى
عجزوا بدرى بدرى
وشعب من كتراللف
هرش عقلى
ياقلبى:
الشمس طالعة
وأنتَ بتدعبس على ملامح للطريق
ومش عارف
الصديق من العدو
والعدو من الصديق
والسما بتصب عتمة على شمعتنا يامه..
صورنا صورة ياصاحبى
صوِّر، بس من غير الملامة
واكتب تحتيها أسامينا
وبيِّن الحزن اللى فينا
وقطِّع الصورة ميت حتة
وأدفن كل حتة فى ركن من وادينا
وادعى ربنا يخلق شعب تانى
ما فيهوش غباوتنا
ولا السواد اللى سكن فى ضحكتنا
ولا قسوة القلب
اللى سقتنا الدم وكأنه عسل فى مياه..
شعب تانى يكون بيحب الحياة
وبيعشق السما والتسامى
ويتطهر بالندى المصرى
وفى عز حصار الحزن
واليأس والحسة والتعامى
يحضن ريحة الفلاحين
وهما راجعين من العزيق
ويتباهى قدام كل الكون
بانتمائه للطمى والمية والحجارة والأسامى..