محمد خفاجى يكتب: "قوايم الانتظار"

فى قوايم الانتظار
هل فيه ملح ومرار؟
والصبر والصبار
والعقدة والمنشار؟
**********
فى قوايم الانتظار
هل حزن مالى نيل؟
هل تاه منَّا الدليل؟
هل ضاع منَّا البديل؟
هل حلمنا دا طار؟
**********
فى قوايم الانتظار
هل فيه أمل جديد؟
هل فيه خبر سعيد؟
أم فيه جرح ووعيد؟
أم بإيدينا اختيار؟
**********
فى قوايم الانتظار
هل فيه حق اللى راح
أم راح ويا اللى راح
والعفو والسماح
فى حالتنا يطفى نار؟
**********
فى قوايم الانتظار
هل يرجع الغريب
ويلاقى له حبيب
يلقاله مكان ودار
أم يتغرب فرار؟
**********
فى قوايم الانتظار
هل نهجر المطامع
والجرى ورا المنافع
ويكون الحق دافع
يتصحح بيه المسار؟
**********
فى قوايم الانتظار
أجيال بتقول لأخرى
استلمى الراية حرة
أمورك مستقرة
أم يفضل فيه سعار؟
**********
فى قوايم الانتظار
بحلم تبقى الحكاية
نهايتها أجمل نهاية
وتكون للدنيا آية
فى طريقة الانتصار
فى طريقة الانتصار