فيسبوك
واتساب
الصبر فى طبع المصريين
زى الصبّار بين رمل وطين
وزُحل بيوزّع بُركانُه
وعطارد غيّر ألوانُه
والمجنى عليه همّا الملايين-همّا الملايين
******
80 مليون حِزب الكَنَبة
فلاّح مزروع حتى الرُكبة
ومراكبى مسافر وعلى الله
عُمّال بعرقهم دول أولى
لوصابهم شرّ تكون نكبة------والفقر يهين
******
ياما تاجر غادر بهمومنا
وباعونا فى سوق اللّى ظلمنا
وباسم الحِكمة كتب دجّال
وباسم الحُب عانيت أهوال
وخداعهم دمّر أحلامنا-------ياولاد حِطّين
*******
عايزين الأمن ولقمة عيش
لمّا اصرخ مرّة ماتقتلنيش
وتعود الضِحكة مع الموّال
وتعود أخلاق الناس مِرسال
والعدل يسود من غير تهميش--للمصريين
صورة أرشيفية
