فيسبوك
واتساب
الحوار الخامس
(قالت البنت لأخيها:)
البنت: أنا مش موافقة
الأخ: ولا أنا
الأخت: ما سألتنيش مش موافقة على إيه؟
الأخ: ولا انتى سألتينى
الأخت: أنا مش موافقة على أى حاجة
الأخ: ولا أنا
الأخت: هوّا كل حاجة أقولها، تقول "ولا أنا"؟
الأخ: يعنى عايزانى أوافق بالعافية؟
الأخت: توافق على إيه؟
الأخ: على اللى انت مش موافقة عليه
الأخت: إللى هوّا إيه؟
الأخ: اللى هوّا كل حاجة
الأخت: كده شاطر.. الله يخيّبك
الأخ: أنا وأنت والمسلمين
الأخت: قصدك مين؟ هما مسلمين عندك يعنى إيه؟
الأخ: مش الإخوان المسلمين
الأخت: يا نهار أسود، هما الإخوان مش مسلمين؟
الأخ: إيش عرّفنى
الأخت: أمال مسمّيين نفسهم كده ليه؟
الأخ: أنا ما لى ما تسأليهم
الأخت: أسأل مين
الأخ: الإخوان
الأخت: أسألهم ليه؟
الأخ: مش أنتِى اللى "مش موفقة"
الأخت: يعنى أنتَ اللى موافق؟
الأخ: قلت لـِك "لأه"
الأخت: طب ما تسألهم أنت
الأخ: يعنى هيّا جت على دى؟!
(انتهى الحوار الخامس)
الحوار السادس:
(قالت الأخت لأخيها:)
الأخت: أنا مش رايحة
الأخ: أحسن
الأخت: أحسن ليه؟ عشان تبقى أنت "الثوار" لوحدك!!
الأخ: احسبيها زى ما انتتى عايزة
الأخت: ما سألتنييش مش رايحه ليه؟
الأخ: واسألك ليه؟
الأخت: عادى
الأخ: يعنى إنتِ عارفة السبب يعنى؟
الأخت: لأه
الأخ: عشان كده ما سألتكيش
الأخت: طيب أسألك أنا
الأخ: اسألى
الأخت: هوّا انت بتروح ليه؟
الأخ: عشان أشارك
الأخت: تشارك فى إيه؟
الأخ: يا خبر أسود!! "كل ده" ومش عارفة بنشارك فى إيه؟
الأخت: كل إيه؟
الأخ: كل اللى عملناه ده وغيّرنا بيه الدنيا
الأخت: هيّا اتغيرت؟
الأخ: هوّا انتِى ما عندكيش خبر؟
الأخت: لأه
الأخ: إنتى جرى فى عقلك حاجة
البنت: الظاهر كده
الأخ: هوّا المرض ده معدى؟
الأخت: حسب المناعة اللى عندك
الأخ: الحمد لله أنا عندى مناعة مستوردة
الأخت: دى مفعولها أكيد، واضح
الأخ: إزاى
الأخت: بتخليك ما تفكرشى من أصله
الأخ: هـــه؟ !!!!!!!
(انتهى الحوار السادس)
