إبراهيم ناجى يكتب: وباظت الأحلام

كل واحد فينا وهو صغير كان جواه أحلام لما بنفتكرها دلوقتى بنستغرب ازاى كانت عبيطة كده؟، ومابناخدش بالنا من إننا فشلنا فى تحقيق الأحلام العبيطة دى.. فى الحقيقة احنا اختارنا إننا نطلع العيب فى الأحلام عشان منواجهش نفسنا إننا كنا أضعف من إننا ننفذها.. عايز تعرف حقيقتك افتكر لما بتكون زعلان أوى وبيكون جواك اسأله كتير كلها بتبدأ ب "ليه يا رب..؟" هتلاقى معظم أسئلتك بتسأل فيها ربنا هو ليه محققلكش أحلامك القديمة دى.. أنا أقولك ليه.

كل حلم بنحلمه بنرسم ليه صورة فى خيالنا ودايما بنرسمه فى أحسن صورة وبنشيل كل المعوقات من قدامه وكأنك بمجرد إنك حلمت فالمفروض هتمشى فى طريق أحلامك بسهولة وبساطة وتحققه زى ما تخيلته بالضبط، طبعا ده ما بيحصلش لأن معظم أحلامنا بتكون مبنية على وجود أشخاص تانية أو على الأقل عوامل بتتحكم فيها أشخاص تانية ولأننا بنكون مستعجلين إننا نبدأ نعيش حلمنا ما بنحاولش نتأكد من مدى إيمان الأشخاص بالحلم ده وهل هما كمان بيحلموا به ومتمسكين به أو لأ وبالتالى مع أول عقبة بتقابل الحلم ده بتلاقى الأشخاص بتتخلى عن الحلم وعنك وبتلاقى نفسك مش لاحق تفكر، هل تحاول تصلح الغلط اللى حصل فى التنفيذ؟ ولا تحاول تقنع الناس ما يتخلوش عن الحلم؟ وهل أصلا الحلم ده صح وإنه لو كان صح مكنش الناس تخلوا عنه وأكيد إنت اللى اخترت حلم غلط.

للأسف مع صغر سننا ولأن أحلامنا واحنا صغيريين بنبنيها على ناس احنا واثقين فيهم جدا إن مكانوش هما أصلا محور حياتنا زى أهلنا، أصحابنا أو شركاء حياتنا- كما نتخيل حينها واللى بيكونوا هما نفسهم اختيار غلط- بنبدأ نتخلى عن أحلامنا قدام إيماننا بالناس دى فى حياتنا ومع مرور الوقت بتصبح دى عادتنا إننا مبنعرفش نحلم لوحدنا وإننا ديما بنقيم أحلامنا بناءا على رأى الناس والنهاية إن أحلامنا بتبوظ.

طيب المفروض نعمل ايه؟ ببساطه جدا لازم الأول تؤمن بالحلم اللى بتحلمه وتؤمن إن الحلم ده الهدف الأساسى منه تحسين جزء معين من حياتك مش تحسين مستواك أو شكلك قدام الناس، كمان لازم تتأكد إن الحلم السهل معناه إنه حلم ضعيف ولو لقيت نفسك بتحققه بسهوله اعرف إنك مش عارف تحلم صح وخليك متأكد إنك حتى لو حققت الحلم ده مش هتفرح بيه لأنه مش هيضفلك جديد، وآخر حاجة لازم ديما تبقى عارف إن الحلم بيفرض نوره على عقلك لحد ما تبدأ تنفذه وساعتها بيبقى فيه طريق طويل ضلمه جدا لو مكنتش مذاكر حلمك وحافظه كويس وكنت معتمد على حد تمشى وراه فى الطريق ده غالبا هتوه فى الضلمة وجايز جدا الحد اللى معاك ده يزهق من حلمك ويرجع ويسيبك جوه ضلمتك عشان كده وأنت ماشى فى حلمك أوعى تثق فى حد غير نفسك وقدرتك إنك تعدى لوحدك الضلمة دى وتوصل لحلمك.

عايز تحافظ على تمسكك ب حلمك ابدأ كل يوم بالأسئلة دى بالترتيب واكتب إجابتك وراجعها كل فتره عشان تعرف إنت حققت قد ايه من الحلم:
١- ايه هو حلمى؟ (اتأكد ديما إنك مبتغيرش إجابتك مع أى مشكلة بتواجهك فى النص )
٢- ايه اللى هعمله النهارده يقربنى من الحلم ده ولو حتى خطوة بسيطة؟
٣- ايه اللى غلطت فيه فى خطوات حلمك امبارح؟ وبعدها على طول اسأل نفسك (هعمل ايه النهارده أصلح بيه غلط امبارح ده؟ )
جايز أوى الإجابات من يوم للى بعده متتغيرش كتير بس لو مسكت ورقة ليوم قديم شوية هتلاقى نفسك قطعت شوط كبير أوى وده هيشجعك تكمل مشوارك.