خلاص يادفعة نازل أجازتك
فرحان ولابس الملكى مكوى
ومهما تتقل الشنطة ريشه
م الفرحة لابس الجزمة تضوى
وف الطريق دار الخيال
وكل واحد حاله حال
فيه اللى شاف خطيبته " زينة "
عروسة بعد شهور طوال
واللى يشوف طرح الجنينة
اللى زرعها مع "جمال"
و"جمال" دا يبقى أخوه الكبير
وعشان دا دفعة طيب أمير
كان ناوى يِدِّى فلوس نصيبه
لاخوه اللى فرحه قرب كتير
ودا دفعة جارى على امه واخته
فى إيده صنعه وقال دا بخته
ومش مهم يِكمل علام
مهم إنه يدخُلُه كام
عشان علاج أمه المريضة
وعشان جهاز أخته سهام
فجأة الخيال وقف فى صحرا
والدفعة صابه ياناس ذهول
خرج الرصاص صاب أغلى زهرة
بإيدين غشيم جاهل جهول
الدم طرطش على الهدوم
والجزمة عفرها الغباء
يادفعة فوق. . يادفعة قوم
الروح خلاص واصلة السماء
وبإيه يفيد؟ . . مين مستفيد؟
إرهاب جبان ويقول دا دين
واللى ف ضلام ساق العبيد
يبقى حبيبه وصديق متين
بالله بنقسم علينا دين
قصاص شهيدنا لو راحوا فين
هنجيبه حتمًا دا عن قريب
قولوا اّمين. . قولوا اّمين
صورة أرشيفية
مشاركة
اضف تعليقاً واقرأ تعليقات القراء
مشاركة
