محمد عمر يكتب: علشان بنت؟

هوا علشان كونى بنت
كل حاجة ليها حد؟
يعنى إيه انى كِبرت
و انى أرضى بأى حد؟

طول حياتى وفى حدود
كل لحظة وكل وقت
فى حواجز فى سدود
كل دا إكمِّنى بنت..

كل شىء معدود عليّا
فين خرجت وإيه لبست
كل شىء محسوب عليّا
لوضحكت أو ابتسمت..

أى حاجة ولو بريئة
تتعمل قصة وحكاية
مش مهم تكون حقيقة
المهم تكون حكاية..

فى كمان بردو ملاحظة..
إللى ممكن يحكى عنّك
مش هيتردد ف لحظة
لو فى حاجة يطولها منّك..

و اللى حتى مش بخاطرى
بردو م المحسوب عليّا
مستوى جمالى وشكلى
كل دا بيحكم عليّا..

كل دا وانا كنت راضية
ديّه تقاليدنا وعاداتنا
بحترم كونها محافظة
حتى لو ظلمت بناتنا..

بس حتى شريك حياتى
مش بإيدى انا الاختيار
لو عاجبنى واحد قصادى
اختيارى الانتظار..

لا غِنَى ولا جاه طلبت
بس عايزه اللى أحبه
عمرى ما كان ليّا شرط
إلا قلبى يحس قلبه..

وقتى ضاع وما كانش ذنبى
و تقلولى السن عدّى؟
لازم اكتم نبض قلبى؟
أى حد أنا لازم أرضى؟

مجتمع ظالم وقاسى
عمره يوم ما حس بيّا
ليه يا أهلى وليه ناسى
بتلومونى وأنا الضحية؟