بنت السما فى الشمس بتحل الجدايل
وبتبدر النيل على السكك يطرح فسايل
بنت السما فى الشمس بتقول للضفيرة
مصر الحقيقة المطلقه والكل زايــل
*****
افرد إيديك وارمح على الآخر
وارفض وعاند واجرى واتفاخر
وان سلموك حصّتك من دولتك رَدّه
ارفض وخد حصّتك من دولتك فاخر
*****
بنت السما فى الضلّة بتفوت ع الجناين
وبترسم النيل سيف على ضلوع كل خاين
بنت السما فى الضلّة بتنام ع الحصيرة
وتبوس ملامح مصر وتغطى المداين
*****
وجّه سلاحك للنظام "التّيت"
واضغط بعزم ما فيك على الطواغيت
الموت بعِزّة يهزّ كِبر الموت
والموت بذلّ يجيب قزازة زيت
*********
بنت السما فى البرد بتلفّ العمامة
وبتطلق النيل يبتسم ويصير يمامة
بنت السما فى البرد بتلمّ الجديلة
وبترقى مصر وتدعى
............... وتقوم بالسلامة
***************
سعيد شحاتة
