أخويا وصاحبى وزميلى
يا دمى اللى انطبع ع الحيط
وقلبى اللى اتروى بنيلى
قسمنا اللقمه والهدمه
ورسمنا الورد فى العتمه
وحلفنا لبعض "بالخِتمه"
ومشيت وعنيك بتدعيلى
أخويا وصاحبى وزميلى
يا وقت الفرح كوز عناب
.... ووقت الشده أزميلي
أخويا وصاحبى وزميلى
يا ضحكة روحى فى الدهليز
ورعشة ضى قنديلي
أخويا وصاحبى وزميلى
ما عادش ما بينّا غير مدفع
وخاين يرتشى ويدفع
ودون مستنى يستنفع
........... بدمّك وبهلاهيلى
أخويا وصاحبى وزميلي
....... وصديقى وعِشرة الدّكه
رباط الود ليه مفروط
....... من الخلان على السكّه
رباط الود ليه ملضوم
.......... رصاص فارغ وناس فكّه
أخويا وصاحبى وزميلي
........ وصديقى وعِشرة الميادين
ما زال فى إيديا كوز عناب
..... وضحكه وكام رغيف "بيتادين"
ما زال فى عروقى حبّة دمّ
............... وشوية سلام صابحين
ما زلت باقول بصوت واطى
.......... بلاش تقتلنى باسم الدين
