فيسبوك
واتساب
(قالت البنت لأبيها:)
البنت: بابا
الوالد: نعم
البنت: لأ مافيش
الوالد: ما فيش إيه؟
البنت: ولا حاجة
الوالد: عيب كدا، فيه إيه؟
البنت: الرئيس مرسى ،
الوالد: ماله؟
البنت: غلبان قوى
الوالد: يروح فى ستين داهية
البنت: يروح، بس هوّا غلبان قوى
الوالد: دا جبان مفترى
البنت: مش باين عليه
الوالد: عشان ضعيف
البنت: وحضرتك؟
الوالد: أنا؟ !! مفترى؟!
البنت: لأ ضعيف
الوالد: طيب وهوّأ أنا قلت غير كده
البنت: وهيا دى حاجة تبسط
الوالد: وهوّا انتى يعنى شايفانى مبسوط؟
البنت: لأه
الوالد: لأه إيه؟
البنت: ولا أنا
الوالد: ولا أنتِ إيه !!؟؟
البنت: ولا حاجة
(انتهى الحوار الأول)
أسرة مصرية عادية جدا (2)
(قال الابن لأبيه:)
الابن: أنا ما باحبش السياسة
الأب: إمال بتنزل معاهم تهبب إيه؟
الابن: دى مش سياسة، دى وطنية
الأب: نعم؟ نعم؟! وإيه الفرق؟
الابن: إيش عرّقنى؟
الأب: خلاص، ما تنزلشى لحد ما تعرف
الابن: ما نزلشى!!؟ إمال أعمل إيه؟
الأب: تعمل زيى
الابن: هوّا حضرتك بتعمل إيه؟
الأب: ما باعملشى حاجة
الابن: يعنى عايزمنى أقعد جنبك ما اعملشى حاجة
الأب: لأ مش قصدى
الابن: إمال قصدك إيه؟
الأب: قصدى يعنى، تقعد يتهيأ لك إنك بتعمل حاجة
الابن: مش فاهم،. ..وهوا كدا كفاية؟
الأب: كفاية ونص
الابن: كفاية لإيه؟
الأب: كفاية للى احنا فيه
الابن: هوا احنا فْ إيه؟
الأب: إيش عرّفنى
الابن: هوّا انتَ حاتنتخب يا والدى؟
الأب: طبعا، طبعا
الابن: حاتنتخب مين
الأب: اللى فيه الخير يقدّمه ربنا
الابن: طب وتنتخيب ليه، ما تسيب ربنا ينتخب لك
الأب: أستغفر الله العظيم
الابن: هوّا انا غلطت؟
الأب: من كل ذنب عظيم
الابن: أنا آسف.
انتهى الحوار الثانى، ( وسوف نكمل فيما بعد)
