محمود مطر يكتب: خليك شجاع وراجع قناعاتك

كله قلقان وحيران وخايف من المستقبل والمجهول.. السياسة وأيه غير السياسة و دهاليزها وصّلنا لكدة: بنكرة بعض، بنخون بعض، كل واحد مستنى للتانى غلطة عشان يشهّر بيه، ويدفنه بالحيا معنويا على الأقل وإذا مكانش بشكل فعلى على أرض الواقع.

أوقات كتيرة بقول لنفسى: ما يمكن إحنا ــ المصريين ــ مش جاهزين للديمقراطية والانتخابات ومعارك السياسية ولعبة المصالح المشتركة والتنازلات السياسية نظريات الكسب والخسارة والتفاوض من أجل تحقيق مصالح حزبية سياسية أو خلافه.. وفى الغالب بصدق اللى قلته.

اللى أنا شايفه عبارة عن ناس كتيرة أوى بتتخانق وكل طرف مصدّق وربما وصل لمرحلة اليقين إنه هوّ الصح، هوّ اللى فاهم، هو الوحيد وكل اللى على شاكلته بس همّا اللى غير مغيبين.. مفيش حد مستعد _ إلا من رحم ربى _ يراجع رأيه ويبصله من زاوية مختلفة ويا حبذا لو من زاوية النقيض بتاعه، أغلب الناس بتقول: خلاص الموضوع منتهى، ومفيش حاجة اسمها أراجع تفكيرى وآرائى و قناعاتى، أنت مش شايف الطرف التانى بيعمل إيه وإيه وإية ؟ أنا الصح واضحة زى الشمس، أنت بس اللى مش شايف.

التطرف بيتخلق من رحم الثقة العمياء بحقيقة تحسبها مطلقة وهى تقبل النقاش مرات ومرات . ومع التطرف لا يقبل الاختلاف، فيصير الاختلاف خلاف أو معركة بين طرفين يجب خروج منتصر واحد، فإما أن تفوز أو تصمت مع اختلاف طريقة إسكاتك من حال لآخر.
فأزمتنا ليها أسباب كتيرة: الجهل والفقر والفساد والتطرف وبالتالى محتاجين حل طويل المدى لأن الحلول المؤقتة فى وطن زى وطننا صفر على الشمال.

لا أملك الحل السحرى، ونفسى فى يوم أقابل اللى معاة الحل، لكن كبداية خليك شجاع، وابدأ بنفسك وراجع قناعاتك وآراءك قبل ما تخليها سيف على رقبة اللى مش مقتنع بيها وتحكم علية إنه مبيفهمش أو ناكر للحقيقة السطعاء أو حتى عدو للدين لما المسألة بتتعلق بفهمك للدين.