فيسبوك
واتساب
******
أنا باكتب لرجال الدولة
-----والناس اللّى ف إيدها مصيرى
والثائر وأصحاب الجولة
----------والناس اللابسين الميرى
أنا واحد م الشعب الصابر
-------وسِلاحى الفاس ويّا ضميرى
وغرامى القطن مع البنجر
--------------والقمح نهاية تفكيرى
والترعة الجايّة بخيراتها
----------والقلل الشاهدة وحصيرى
ومسلسل بعد العشويّة
----وأشوف الفرحة فى عين غيرى
ولا باعرف أحزاب البندر
------------ولا رُحت ميدان التحريرِ
مايهمّش مين اللى هيحكم
---------ولا مين هيسطّر دساتيرى
ولا يوم بتفلسف فى سياسة
-----------ولا حاول جارى تفجيرى
ولا باجرح ولا باقتل ناسى
--------------ويزيد اليُتم بتفكيرى
دا انا مُسلم ماسك ب اركانى
--------ولا بِعت بلادى ب دنانيرى
ولا عمرى هاطاطى لغير الله
----------سبحانه الخالق وكبيرى
لكن مين يكسر وحدتنا
----------ويفرّق أهل الشماشيرى
أو يِفرد عضلاته علينا
-----------وبخبث يحاول تدميرى
راح افزّ عليه زىّ البُركان
----وافنيه ب اِسنانى وضراضيرى
******************************
علم مصر
