محمد عمر يكتب: منظر مش حضارى

تضامنا مع صاحب أى مهنة أزاحته الحكومة عن مكان يمارس فيه مهنة ً شريفة دون أن توفر له البديل.

هجموا ع الفَرشة وهُبة
قالوا منظر مش حضارى
هوا أنا يا عالم يا رِمة
فرشة الأرض اختيارى؟
وألا يمكن جاى بلعب ؟
ولا أنا فى رحلة سفارى؟
من زمان بشقى وبتعب
ليلى ما أعرف من نهارى
كوم عيال فاتحة حلوقها
جوه حارة من الحوارى
والكبيرة القَطر فاتها
وف جهازها غُلب حمارى
م الجميع باخد وبشحت
مرة صاحبى ومرة جارى

***********
لو هقول راح منى تسمع
فى كتير و كتير سهارى
ليه ما بتبصوش شوية
تاخدوا تاركم ويّا تارى؟
م اللى بانيين العماير
و اللى راكبين الفيرارى
ع الرصيف انا خدت حتة
أرضهم مالية الصحارى
شوف فنادقهم فيللهم
فيها أصناف م الجوارى
داخلة جوه النيل يا خِفة
و الا يعنى صاحبها شارى ؟

**********
وللى قلتوا ده حرامى
جوه كرشه كتير مدارى
حطيتوه وف سجن جنة
فى الدلع عصفور كنارى
بُستوا إيده و بُستوا رجله
لَجل ما يقول إيه مدارى
قول يا حلوة قول يا نُغة
و القانون شغال و سارى
طب هناخد بس حبة
ظبّط انت الحال و دارى
وللى بره لسه بره
ده وقع... قام غيره جارى

************
علّقوه فوق من ودانه
دى بقت حاجة اضطرارى
قررّوه راحت فلوسنا
هيه فين يا" ..." ضارى؟
وللى بره اجروا وراه
مش ورانا ع الكبارى
و الا يعنى جديد عليكم ؟
مانتو عاملينها فى جارى
إللى كان عايش فى حاله
آه يا غُلبى يا مرارى
يومها.. غلطة.. راح يصلى
قمتوا خدتوه فى العصارى
م اللى شافه فى ضيافتكم
جه بنفسه ما عادش دارى .

************

هوا أنا يعنى الشوارع
م النضافة بقت مَزارى ؟
ولا أنا بيه جوه بيتنا
والصياعة بقت قرارى ؟
ولا م الكافيار زهقنا
فولة بايتة بقت فطارى ؟
طب شوفولى انتو شُغلة
أى حاجة تطفى نارى
حاجة و آكل منها لقمة
مش بقول منصب وزارى
يا تسيبونى ف حالى اشقى
واقبلوا منى اعتذارى
نفسى بس يا عالم آكل
مش كباب ...لأ سم هارى .