فيسبوك
واتساب
مصر رافعة الراية ليكم
دمعها جاى بيناديكم
يا ولادى قلبى طافح
مِلّى داقه من مرار
ضاع شبابى بين إيديكم
ف المحن بسهر عليكم
مين عِرف منكم يسامح
مين قِدِر ياخد قرار
قولوا ليه ضِحّكتوا بَارت
والليالى الحلوة دارت
مين ما بينكم لسة صالح
مين بيدعى ليل نهار
بحر شوك مالى الجناين
فيه أصيل فيكم وخاين
مين ما بينكم قلبه طارح
مين بيشّعِل فيه شرار
مين بيكسرلى ضلوعى
مين بيستنىَ خضوعى
مين ف ليل الظُلم سارح
مين بيتمنىَ انهيار
مين بيتآمر عليا
مين بيرسم ضحكه جايه
مين بيعمل فيها فالح
مين بيضربنى بعيار
هُنت ليه ما بقتشى غاليه
والنجوم ما بقتشى عاليه
ليه غرقنا ف المصالح
ليه عشقنا الانتحار
ابن بطنى وقت ضيقه
يعرف الباطل حقيقه
يبقى صقر ويبقى جارح
يبقى حامى للديار
صورة ارشيفية
