أنا صحيح كنت مع مرسى لأقصى درجة بس مش عشان مرسى، ولا حتى عشان الإخوان، أنا كنت مع مرسى عشان مصر وكان عندى أمل فى بكرة أن مرسى ها يحقق مطالب الشعب، ولكن للأسف كل ما ييجى بكرة أخده على جنب وأكلمة ألاقى بكرة نفسه كره نفسه زيه زى الشعب، وبيقولى بلاش تعب قلب.
وللأسف لقيت مرسى ماشى فى نفس طريق مبارك ولذلك كان مصير مرسى المعزول هو نفسه مصير مبارك المخلوع، وما حدث هو انقلاب فعلا على السلطة، وعلى الرئيس المنتخب الشرعى ولكنه انقلاب شعبى، وليس عسكريا، كما يقول الإخوان طبعا ولو الشعب عايز مرسى ما كنش ولا ألف سيسى زحزحوه من مكانه، مع احترامى لهذا الرجل العظيم، الذى أصبح رمزا، ولو مرسى قدم السبت كان لاقى ألف حد، إنما للأسف مرسى كان عاجزا طول السنة ولسنا فى حاجة إلى رئيس عاجز، الشعب دايما فى حاجة إلى رئيس يحل المشاكل ولكن مرسى وجوده فى حد ذاته كان مشكلة ولذلك كان صعبا أنه يستمر وعلى الإخوان أن لا تلوم إلا نفسها، ويا ريت البلد بقى تفوق وتعرف راسها من رجلها.
وعلى الإخوان أن لا تحزن على مرسى بل تفرح دا لو هما صحيح بيحبوا الخير للشعب كما يقولون لأن استمرار مرسى مكنش فى خير لهذا الشعب أبدا بأى حال من الأحوال.
ولو مش مصدقين اسألوا الناس ويا ريت يكون فيه شوية دم وإحساس الرئاسة مش بالعافية، وأنا شايف إللى بيحصل دلوقتى بجاحة وكل يوم الناس بتكره الإخوان ومرسى أكتر من اليوم إللى قبله وأنتم إللى بتخسروا وأنتم إللى حرقتوا نفسكم بنفسكم والشعب كله بقى ضدكم وإللى بيحلم بعودة مرسى بالظبط زى اللى بيحلم بعودة مبارك، وعلينا أن نغسل يدينا من هذا وذاك
من لم يحترم هذا الشعب عليه أن يرحل فى صمت وهدوء، ويحاسب على كل ما فعل بحق ربنا.
محمد مرسى
مشاركة
اضف تعليقاً واقرأ تعليقات القراء
مشاركة
