كل مرة لما أقابلِك
بلمحك وبقول يا بختِك
مش حسد ولا غيرة منِّك
بس كان نفسى أبقى زيِّك.
من سنين فاتت طويلة
بفتكر أيام جميلة
كلها من ألف ليلة
لما كنت زمان فى سنِّك.
كنت لسة صغيرّة
وردة حلوة منوَّرة
ويّا واحد كان حبيبى
زى ما صاحبك دا حبك.
حبِّنى لكن مفيش
الهوى ما بيشتريش
سابنى ساعتها وقاللى
جرّبى مع غيرى حظك.
والحياة فضلت أسيّة
عيشة صعبة ومُرّة هيّه
فى الظروف الصعبة ديّه
مين هييجى يقول بحبك ؟
عدت الأيام بتجرى
اتسرق من حضنى عمرى
واما يوم منِّك بيهرب
مستحيل يرجع لعمرِك.
فين حبيب يدّينى حبه
أعشقه وأعيش فى ضلّه ؟
فين ولد يجرى يقوللى
إنتى ماما وأنا ابنك؟
قلبى من جوّاه داعيلك
يختلف عن جيلى جيلك
تفرحى وتعيشى عمرك
مع حبيبك اللى حبك.
صورة ارشيفية
مشاركة
اضف تعليقاً واقرأ تعليقات القراء
مشاركة
