مايسة مسعود تكتب: بحلم يا صاحبى

أحلام يا صاحبى بتهرب منى، والزمن غريب عنى عايش فى بلدى زى الغريب.. بحلم يا صاحبى وبهرب للخيال أصل الواقع مرار بحلم بعالم خال من الدمار والانتقام، بحلم بعالم كله رحمة وإنسانية، بحلم وبهرب للخيال والحرية والحب، إللى يا ما بدور عليه، بحلم يا صاحبى والحلم طال والحياة أصبحت محالا، بحلم بحقى ومش لاقيه.

بحلم أشوف العدل بينا من الظلم، شعرى شاب ومن الحزن قلبى داب، بحلم والدنيا بتمشى عكسى وكل فرحة تخطفها منى، والخوف غير ملامحى، بحلم وبهرب للخيال والصبر يا صاحبى طال والفرحة أصبحت بعيدة، لكن لسة فى الحلم عايش، برسم نجوم ووردة بألف لون، وقلوب مليانة خير وعيون لسة بتضحك.

برسم وفى حزنى أغنى وصوتى يوصل للسما بدون كسوف، بحلم وبرسم بيوت مفيش جواها خوف بحلم بحب خالى من الألم حب يمحى كل الذنوب
حب خالى من المصالح زى حب أبويا وأمى، بحلم يا صاحبى وبرسم عيون ضحكتها بألف لون وقلوب لسة بريئة تشوف فيها الحقيقة.