محمد زكريا حبيشى يكتب: وما همكيش

إنى أموت فـ الدنيا دى أو حتى أعيش
وما همكيش
إنى أكون ليكِ وطن بجناح وريش
وما همكيش
إنك تكونيلى الوفا فـ بحور جفا
وأنده بعلّو الصوت تعالى ما تسمعيش
وما همكيش

اسمك وشكلك هيّئتك كل اهتمامك
حتى حلاوة طلـّتك سحْرك غَرامِك
مابقتش أحس بـ ضحكتك رقة سلامِك
والنظرة من عينِك خلاص ما بترونيش
وما همكيش

هى هوايتك تجرحى كل القلوب
والناس تشوفك تعشقك وأنتِ يا دوب
من نظرة ليكِ يسكـروا وقلوب تدوب
وبهون ولكن ليه عليا ما بتهونيش
وما همكيش

بتعلّمى الأرض الكلام إزاى يدور
وأنتِ حقيقتك مؤلمة فـ الكون تدور
واهمة بأنك فـ الهوى بدر البدور
وتلومى قلبى لو بعد لا متلوميش
وما همكيش

إحساس غلط إن الجمال ليكِ اتوصف
نهر الحنين جواكِ كان مليان وجَف
حتى الأنين قلبى سِمع صوته رجَف
ما بقتش فارقة إنك تغيبى متغبيش
وما همكيش

أنا مش بلومك بس عايزك تعرفى
إن اللى حبك وانخدع قلبى الوفى
ما قبلش مرة يرضى بالحب الخفى
جاوبى كل الأسئلة ولا تكدبيش
وما همكيش