عبد الله صقر يكتب: كنت بحلم بالحرية

حرية..... حرية
معنى غايب... معنى تايه عنى
وعن الحبايب
معنى مدفون.. جوه السجون
اسم مدبوح.. وموش مسموح
بيه نبوح
أه يا حرية
يا كلمة كبيرة عليا
أه يا حرية
يا غالية عليا
لكن يا خسارة
معنى مقتول فيا
حرية... حرية
عايش وموش حاسسها
عشان حقوقى
موش ليا
تايهة.. وضايعة
من حواليا
كلمة شايلها جوه ضلوعى
أه يا حريتى يا ضايعة منى
بناديكى بأعلى صوتى
.........................

يا حرية
يا مذبوحة بأيدينا
وبأيدين غيرنا
وغيرنا قاسى علينا
أه... وأه خارجة
من صدرى
زى دخان النار
أه وبقولها على كل ظالم جبار
ماسك فى أيده سيف بتار
أه من كل ظالم وكل جلاد جزار
ملوث أيديه بدم بشر
وعلى أيديه الظلم أنتشر
أه بقولها من قلبى
على كل مظلوم
شاف الظلم من سجانه فى يوم
..................................

بيقولوا الحرية موجودة
أيوه موجوده
وبنشوفها فى ليالى سودة
أيوه موجودة
وبنلاقيها جوه حيطان مسدودة
أو على أيد ظالم ممدودة
أو بنلاقيها على الورق مكتوبة
أو على سيوف مسنونة
أو بنلاقيها فى مشانق منصوبة
.................................

الحرية.............. الحرية
كلمة غالية أوى عليا
نفسى أشوفها يا ناس
طول عمرى بحلم بيها
نفسى أشوفها حتى لو ها أشتريها
المهم أحس بيها