عبد الحميد بدوى يكتب: الإخوان حرقوا نفسهم

مع الأسف
الإخوان حرقوا نفسهم بنفسهم
والبلد كلها بقت ضدهم
معرفش إذا كان فى حد ظلمهم
ولا هما بسلامتهم ظلموا نفسهم

لو كانوا صبروا شوية
ماكنش دلوقتى بقى حد قدهم
وكل حاجة كانت هاتبقى تحت أمرهم
لأن بصراحة مفيش حد منظم زيهم
تفكيرهم الأول كان تفكير سليم
وقولوا المشاركة لا المغالبة
والرئاسة بعدين

إنما الصراع
على الكراسى والمناصب
والوصول للسلطة لحس مخهم
خليهم يشبعوا
بعد ما خدوا كل حاجة لوحدهم
بكرة هايسيبوا كل حاجة غصب عنهم

بس أنا بقول كلمة حق
لو كان أى حد غيرهم
كان برضة بقى شكلهم
وإذا كانوا هما وحشين
المعارضة كمان أوحش منهم
البلد دى آخر همهم
وأنا عن نفسى
معدتش بصدق حد
وربنا يستر والبلد دخلت
فى حيطة سد
وملعونين كلهم
وزى ما حرقوا قلبنا
ربنا هايحرق قلبهم
والإخوان حرقوا نفسهم بنفسهم
وربنا كشف أمرهم
محدش يقولى انهم بيمثلوا
المشروع الإسلامى
أنا بطرح سؤال
أنا عايز أعرف مرسى قدم إيه للإسلام
خلال عام؟!
الناس بتترحم على أيام مبارك
ولا أنت مش واخد بالك
وعامل فى التوهان
الظلم هو هو ويمكن أكتر كمان
واحنا تعبنا من الكلام
ألفين سلام وتحية لمرسى وللإخوان
وربنا يستر على مصر بكرة لا تصبح فى خبر كان