أحمد عبد الموجود الشيخ يكتب: سر عشق الأرض

عمرى يا أرضى يا عرضى ودارى
يا صبرى ونارى ما كنت هدارى
ف ضهرى الخنجر
واعدتك ف السينما الصيفى
ووعدتك لو تعملى عبلة
أنا هلعب عنتر
لو فوتينى ف يوم وجريتى
عن جرى السكة وراكى ما أكل
ولا أمل ولا صدرى يغل
ولا أتأخر وف دمى أعكر
وف نفسى أذل
عمرى ما كنت هموت زرعك
نايم قايم ميت ف شوارعك
هايم دايم ف الصلا علشانك
بدل الميه الدم بيروى غيطانك
كنتى ف قهرك أو ف حنانك
سودة ف عينى وقلبى
بيطفح وبيطبع ألوانك
كان يسرى ف وريدى النيل
كان يقلع قلبى فيضانك
راح نلعب يلا اتغمى
آسف فكرتك بالغم
والهم ف أرضك ما بيتلم
ابعدى عنى متعشقنيش
نورك ما هييكفيش
ضلامى قدامى
وهوايا جوايا معيشنيش
الكلام لو يطول بدون معنى
ما منه إلا الصداع
والعقل لو يعقل بدون تفكير
ماجن ف يوم ولا يوم ضاع
أنا مش هسيبك ولا أرحل
لكن سيبينى براحتى فيكى
أعيش كما الصناع والزراع
والجواع وإللى ما مرتاح
سيبينى أعيش فيكى
سواح