فيسبوك
واتساب
مش هتكسف لو يتعرف
أنا بنت م الحى الفقير
لو حتى كنت هتتقرف
أنا بنت م الحى الفقير
أهلى هنا وعيشتى هنا
زيى هنا فى ناس كتير
فى فقر فى زحمة وشقا
لكن فى قلب وفى ضمير
وخناق يقوم من غير سبب
لكن قلوبنا من الحرير
تصفى أوام زى اللبن
والزعلة والحمقة تطير
م العيبة والعيب نختشى
ع الست والشابة نغير
مش يعنى علشان من هنا
نبقى زبالة وشىء حقير
فى منا ناس تعجب أوى
فى منا كاتب.. فى وزير
وف كل حتة فى البلد
لينا هناك مليون سفير
اتولدوا واتربوا هنا
ومن هنا بدأوا المسير
حتى اللى هاجر حينا
بيزورنا وبييجى كتير
منهم كمان عايشين هنا
ومعانا بيشاركوا المصير
مش يعنى علشان من هنا
نبقى ف تخلف وف تأخير
لمّا انت حبيتنى أنا
كنت ف عينيك انا شىء كبير
العفة و الذوق و الأدب
والحكمة و العقل البصير
و شياكتى و جمالى العجب
جدعة و بعشق كل خير
يعنى ما حبيتش المكان
و لا بنت و لا أخت الامير
و لا كنت انا بضحك عليك
بكلامى عن عالم مثير
طب لما تعرف عايشة فين...
ليه فجأة يحصلّك تغيير ؟
وكأن صدمة هزتك
وعرفت عنى شىء خطير
حكمة هقولهالك بقى
لو زيى بتحب التفكير
لو جيت تضوّر ع الدهب
فين هتلاقيه.. دا شىء أخير
بتروح لصحرا أو جبل
واما تلاقيه تفرح تطير
واللؤلؤة تفضل كده
لو كًت فى بركة أو فى بير
و الطوبة راح تفضل كده
لو حتى فى البحر الكبير
مش هتكسف لو يتعرف
أنا بنت م الحى الفقير
لو حتى كنت هتتقرف
أنا بنت م الحى الفقير.
صورة أرشيفية
