لفى وديرى المبخرة
لفيها أيوا شمال يمين
شايفين فنون المسخرة
وشهيدنا ماله يا ناس حزين؟!!!!!!!
يصرخ فى توب الكفن
حلمى معاى اندفن
ليه البلاد ف العفن؟!
والسوس عاملها منخرة
واحتاروا فيها المخلصين
نفس الرشاوى والوسايط
والفساد دخانه شايط
والهموم طارحه سبايط
بلاك بلوك.. وإيش تمرُّد
ماشين نعك.. وإيش تجرُّد
واحنا فى الوكسة تفرُّد
والوطن عايش تشرُّد
واحنا ف الزفة عبايط
والثورة راحت فشخرة
لفى وديرى المبخرة
لفيها النوبادى يمين شمال
دا الهموم فوق الكتاف أحمال
والحياة فوضى وسايبة
والقلوب ف همومها دايبة
العداله كلمة حلوة
بس جوّا بلادنا غايبة
ف الوطن أحلامنا خايبة
أزرع الورده ف بلادى
تطلع ريحتها يا ناس مجارى
ريحة المجارى يا ناس
بُصوا ع الوضع اللى جارى
شموا ريحته يا ناس
..افـ.....
إيه ال....
لفى وديرى المبخرة
بخرينى وزغرتى
صَـوَّتى
اتعفرتى
دا الخيبة خيبتى
قمت أيوا آه بثورة
قلت بكرة أرد هيبتى
رحت راكب قطر حلمى
قالوا اصحى ياله فوق
ساعة بلدنا مأخرة
هوا ذنبى ولا َّ عيبتى
إنى مصرى برىء بطيبتى
كنت فاكر بكرة أحلى
دوَّخينا آه يا نحلة
لسة قاعدة العيشة ضحلة
والرغيف بنشارته سحله
والعيون مش لاقية كحلة
كل مأزق ألف وحلة
اللصوص طلعت براءة
وبجراءة
أدوهم وسام المفخرة
لفى وديرى المبخرة
نفس المصايب والمرار
نفس السيناريو والحوار
عاشق ترابك ومتحيَّر
ابنك أسير ومتسيَّر
إيه اللى فيكى اتغيَّر؟!!
صاحيين نايمين
سامعين شايفين
نفس الكابوس والمشخرة
لفى وديرى المبخرة
رشى دمعى ع الجدار
لفلفى على كل دار
اعملى حفلة وزار
قولى حلمك كان هزار
أحسن يا ستى يحسدونا
احنا اللى تهنا ف المدار
والعباقره بيقودونا
عشنا نحلم بالنهار
عشنا نحلم بالشروق
نمحى ذل وكل عار
قلنا بكرة أكيد نروق
والوطن يبقى اذدهار
نرتوى نبل العروق
تفضل الثورة انبهار
نزرعك ياسمين
وتين
ليه بنلقى الدنيا طين؟!
ف الهموم متبربطين
نفس الوشوش متلونين
من حزب لا وطنى وفساده
اللى خصخص
واللى مصمص
واللى قصقص ريش بلاده
واللى خلا كلاب ولادة
من قوت ولادى
متلذذين
بالقانون طلعوا الجناة
متعززين
والغراب خطف الدولار
كهربة وأزمة سولار
ف البنوك حاطين خزين
والوطن قلبه حزين
والشهيد ماخدش تار
إيش تمرُّد
إيش تجرُّد
واحنا ف الوكسه تفرُّد
والوطن عايش تشرُّد
الوطن قاعد بيصرخ
واللى سامع فينا مين؟!!!
الحكايه مش شعار
العداله هيَّة دين
تبقى ظلم يا ناس مبين
لو جات فى يوم متأخرة
لفى وديرى المبخرة
لسه الأمور متمسخرة
لسه الأمور متمسخرة
صورة أرشيفية
مشاركة
اضف تعليقاً واقرأ تعليقات القراء
مشاركة
