د. هانى أبوالفتوح يكتب: نِشْكى لِمين يا نِيلْ !

باحلم أنا باحلم كتير
باحلم عشان أنسى معاه
حلمى الكبير
أحلم بلقمة عيش
وأحلم بنام يوم عالسرير
مش بس نوم عالخيش
أو بجناحات عايز أطير
...................
صابر أنا
رغم اللى فيا من زمان
ايه بس غَيَّرْ سِكِّتى
وجدد الأحزان
ضايع و تايه فى طريق
معرفلهوش عنوان
أنا اللى عشت العمر بين شطين
أجرى فى أمان
الخير يجينى
لما بجرى معاه
من مكان لمكان
بس اللى كان يروينى
بقى زينا عطشان
...................
معرفش ليه فى السن ده
وجع العطش طالع منين
غلبان هنا عايش حزين
معرفش بعد الهم دا
هاشْكى لمين
أنا كنت راضى بدنيتى
وبقسمتى وعرق السنين
.....................
نشكى لمين يا نيل
ومين هيسمعني
مشتاق وقلبى عليل
ارجع و رجعنى
لأيام جميلة يا نيل
لو كنت سامعنى
فاكر زمان يا نيل
تروى و تِشَبَّعْنى
دلوقتى ليه بتقول
يا مصرى وَدَّعْنِى
.................
من بعد خير فيضان
دلوقتى شايفه دموع
شايف قسى وحرمان
خوف فى طريق مطبوع
رد وقال لى خلاص
م الأصل انا مخنوق
بعد ما كان لى فروع
وسد عالى لفوق
و يسد أيها جوع
.......................
اللى وهبته حياتي
و اللى عليك حاكمين
يستنوا بس وفاتي
ويبيعوا أحلى سنين
النهضة طلعت سد
والسد سد لعين
مين فينا يشكى يقول
والشكوى بس لمين
حكامكوا مهما نقول
سدوا العقول بالطين
ولا عاد هناك مسؤول
و لا يسمعوا السامعين
....................
خدها نصيحة يا نيل
الشكوى دى لله
والصبر حلو جميل
مهما تطول الآه
واللى عمل للخير
فى الآخرة راح يلقاه
واللى يبيعنا يا نيل
له نهاية تستناه
واللى اعتبر من غيره
كانت العبر دى دواه
الشكوى واصله يا نيل
ولا شكوى غير لله
من عاش عشان الخير
مالهش غير مولاه
...................
بطلت احلم يا زمن من تاني
والنيل حبيبي
اللى بخيره رواني
كاتب على فروع الأمل عنواني
ما أقدرش أعيش بعدك يا نيل وحداني