عبدالله صقر يكتب: الخوف وصناعة الجلاد

هو السجان
وأنا المسجون
هو القاتل وأنا المقتول
أنا اللى بخلق جلادى بإيديا
وبناوله سياط مغزول
علشان يلهب بيه
ظهرى ورجليا
ويدخلنى فى المجهول
وفى النهاية كلمتى بتتسجن فيا
........................................
أنا اللى صنعت كل السجانين فى الدنيا
وأنا اللى صنعت جلادى بإيديا
لأنى أتغابيت واتخاذلت وهادنت
واتهاونت فى حقى
لأن لما كان معاندنى ومتحدانى من الأول
أنا اللى اتراخيت ورضخت وزرعت الخوف جوايا
...........................................................
وعلشان كده ركبنى ودلدل رجليه
يا ليتنى كنت اتحديته
وقتلت قلبى وصديته
وكنت ضحيت بعمرى
علشان غيرى يقدر يعيش بحرية
وكنت قلت له لأ لأ لأ
لا تفاوض ولا انكسار
علشان أولادى يشعروا براحة واستقرار
ويقدروا يرفعوا الرأس من بعدى
......................................................
لكن جلادى للأسف كان جبار
كان أقوى منى وقدر عليا
علشان كان حامل فى إيديه مدفع وبندقية
بيضرب بيهم عليا
كل دقيقة وكل ثانية
وأنا لا حول لى ولا قوة
مفيش فى إيديا غير عصاية ملوية
وكمان معووجة أومكسورة
ولو ضربنى...... موش ها أقدر
أدافع عن نفسى
لإنها زى الإيد المبتورة
وفى صدرى سنين عمرى محشورة
وعلشانها مقدرتش أتكلم
على فكرة
الجلاد موش مارد
ولا هو غول شارد
ولا هو أسطورة
هو مخلوق زينا بس احنا اللى كبرناه
وعملنا منه منظر وصورة
إنسان صنعناه بإيدينا
وسكناه بالخوف فى قلوبنا وخيالنا
وبتنا نحلم بيه
لإننا بنخاف والخوف معشعش فينا ومالينا
واحنا اللى حولناه من إنسان لشبح مزعج ومخيف
.....................................................
جلادنا.... لما كان بيضربنا
كنا بنخاف ونطاطى
ونسكت على أعماله وجرايمه يوماتى
وسكوتنا هو سبب استوحاشه
لدرجة إنه نصب زنازينه علينا
ومشانقه صنعها على قدينا
قدر يصنع عتمة السجن فى صدورنا
وفى بيوتنا وفى عقولنا وفرض السجن
حتى فى شوارعنا وفى مدارسنا وفى مناهجنا
غلشان الخوف اللى كاسينا ومالينا
قدر بعنفوانه يسيطر علينا ويخللى السجن شعور جوانا
وعيونا بالدموع مليانة
.............................................................
ممكن يفرض علينا مليون سجان
ممكن نلاقيهم فى عملنا وخطاوينا وفى كل مكان
ليه صنعنا الخوف فى نن العين؟
وليه زرعناه فى نياط القلب وعلى الجبين؟
وليه حصدنا فى كل لحظة وكل حين؟
علشان احنا من الأول متخاذلين
..........................................................
على فكرة
موش شرط السجن زنزانة وسجن وقضبان
أو سياط بتلهب الأبدان
أو عشماوى بياخذ روح إنسان
أو أرواح بتتحول لأكفان
أو سجان قاسى بيمنع عنا الكلام
أو بيحجب عنا الآمال والأحلام
أو سجان يفقأ عيونا علشان
لحريتنا لا نشوف
أو يصنع جوانا الرعب والخوف
أو يحجب عنا ضوء النهار
أو إنه يخللى ليلنا طويل وملهوش عنوان
......................................................
ساعات السجن بيكون إحساس
بيصنعه جلادنا فى قلوبنا
لأنه سكن ونام جوانا
وقدر يرهبنا ويمشينا على هواه
وحسب ما هو عاوز