يوم القبض بالنسبالى يوم تاريخى
كل إللى ساكنين ع الأرض من الفرحة بيسمعوا صريخى
يوم واحد ف الشهر بستناه بفارغ الصبر
ده اليوم إللى بتغطس فيه اللحمه ف طبيخى
قبل القبض بيوم ما بعرفش أنام
بيطير من عينيّا النوم وأفضل أقول يا سلام
لو أقبض فلوس زيادة ولا ما يبقاش فيه خصم كالعادة
وأفضل أفكر إيه إللى هشتريه بعد القبض كمان
أما يوم القبض فببقى صاحى سعيد
نشيط والود ودى لو ألبس لبس جديد
وبروح على شغلى بدرى وأنا بقول مين قدى
النهارده أنا أغنى واحد ف الدنيا أكيد
وأول ما بقبض بفوت ع الفكهانى
وأقف أتفرج ع الفاكهه اللى عجبانى
ألاقى الأسعار نار أقول مش كفاية الخضار
طيب ع العموم أفكر وأرجع تانى
وأخد بعضى وأمشى وأقول ع الجزار
أروح أشوف إيه أخبار اللحمه وإيه الأسعار
ألاقيها زى العادة غالية أوى بزيادة
ولو فكرت أجيب كيلو هلاقى نص المرتب طار
وتفضل رايحة جاية ف دماغى الأفكار
طيب أخد الخطوة وأقوله يا جزار
إن شا الله ما حد حوش إدينى كيلو
وأرجع أقول أفكر تانى قبل ما أخد القرار
وأخد بعضى وأمشى وأقول ع الحلوانى
أروح أتفرج على الحلويات اللى عجبانى
شرقية وغربية تورت وكنافة محشية
ألاقيه زى غيره ف أسعاره برضه مغلوانى
أرجع أفتكر الأقساط اللى عليّا
ده غير كمان فلوس الجمعية
آخد نفسى وأقول لنفسى
معلش يا بطل أديك اتفرجت شوية
صورة أرشيفية
مشاركة
اضف تعليقاً واقرأ تعليقات القراء
مشاركة
